بیجنگ 19 ڈسمبر(ایس او نیوز/ایجنسی) چین کے شمال مغربی علاقوں میں زلزلے کے شدید جھٹکے محسوس کئے جانے کے بعد کئی عمارتیں زمین بوس ہوگئیں جبکہ قریب 126 افراد ہلاک ہو گئے۔

خبررساں ادارے ’اے ایف پی‘ کی رپورٹ کے مطابق سرکاری نشریاتی ادارے ’سی سی ٹی وی‘ نے بتایا کہ صوبہ گانسو میں زلزلے کے سبب 100 افراد ہلاک اور سیکڑوں زخمی ہوئے جبکہ پڑوسی صوبے چنگھائی کے شہر ہائیڈونگ میں 11 افراد ہلاک اور 100 زخمی ہوئے۔

یوروپی میڈیٹیرین سیسمولوجیکل سینٹر کے مطابق زلزلے کی شدت 6.1 ریکارڈ کی گئی تھی لیکن چین کے سرکاری میڈیا کے مطابق زلزلے کی شدت 6.2 تھی۔ زلزلے کی گہرائی 35 کلو میٹر جبکہ مرکز صوبے لانزو کے دارالحکومت سے 102 کلو میٹر دور جنوب مغرب تھا۔

حکام نے زلزلے کے فوراً بعد امدادی عملے کو متاثرہ علاقوں کی جانب روانہ کردیا، متاثرہ علاقوں کے ہسپتالوں میں ایمرجنسی نافذ کردی گئی، چینی صدر شی جن پنگ نے ریسکیو اداروں کو تلاشی اور ریلیف کے لیے ہر ممکن کوششیں کرنے کی ہدایت دی ہے۔

یاد رہے کہ رواں برس اگست میں چین کے مشرقی علاقے میں 5.4 شدت کے زلزلے کے سبب 23 افراد زخمی اور درجنوں عمارتیں منہدم ہو گئی تھیں، ستمبر 2022 میں سیچوان صوبے میں 6.6 شدت کے زلزلے سے تقریباً 100 افراد ہلاک ہو گئے تھے۔ 2008 میں 7.9 شدت کے زلزلے کے سبب 87 ہزار سے زائد افراد ہلاک یا لاپتہ ہوگئے تھے، ان میں 5 ہزار 335 طلبہ بھی شامل تھے۔