منگلورو 18 / نومبر (ایس او نیوز) ہندوتوا وادی مذہبی جنونی ٹولے کی انتہائی گھٹیا  ذہینت کا مظاہرہ پیش کرنے اور انسانیت کو شرمسار کرنے والاایک  پیغام انسٹاگرام کے "ہندو منترا" نامی اکاونٹ پر پوسٹ ہوا ہے جس میں اڈپی کے نجارو  میں ایک ہی خاندان کے چار افراد کے قتل کی ستائش کی گئی ہے ۔ معاملہ سامنے آنے کے بعد پولس نے آزخود نوٹس لیتے ہوئے   اس تعلق سے معاملہ درج کرلیا ہے۔

    تین خواتین اور ایک کم عمر لڑکے کے وحشیانہ قتل پر جہاں پورے ضلع میں سوگ اور دکھ کا اظہار کیا جا رہا ہے وہیں پر بڑی بے شرمی سے انسٹاگرام پر تُولُو زبان میں پوسٹ کیے گئے پیغام میں "محض پندرہ منٹ میں چار مسلمانوں کے قتل کو ورلڈ ریکارڈ" سے تعبیر کیا گیا ہے ۔ اور قاتل پروین چوگلے کی تصویر کو فوٹو شاپ کرکے اس کے سر پر تاج دکھاتے ہوئے اسے "بادشاہ" کے روپ میں پیش کیا گیا ہے ۔

    اڈپی ضلع ایس پی ارون کمار نے بتایا کہ اس طرح کا پیغام سامنے آتے ہی اُڈپی سی ای این پولیس نے فوراً کارروائی کی ہے اور جرم نمبر 140/2023 کے ساتھ آئی ٹی ایکٹ کی دفعہ 66 اور آئی پی سی کی  505(2)سائبر کمپلینٹ درج کی گئی ہے ۔  اس کے علاوہ انسٹا گرام اکاونٹ ایڈمن کے خلاف اڈپی سی ای این پولیس اسٹیشن میں ایف آئی آر بھی داخل کی گئی ہے ۔