اڈپی میں بھاری برسات کی وجہ سے سیلابی صورتحال - منگل کو اسکولوں میں چھٹی؛ طلبہ سمیت متاثرہ افراد کو محفوظ مقام پر کیا گیا منتقل

Source: S.O. News Service | Published on 8th July 2024, 7:08 PM | ساحلی خبریں |

اڈپی،  8 / جولائی (ایس او نیوز) ضلع کے مختلف مقامات پر زبردست بارش کی وجہ سے سیلابی صورت حال پیدا ہوگئی جس کےبعد متاثرہ علاقوں سے طلبہ اور دیگر مکینوں کو محفوظ مقامات پر منتقل کرنے کے لئے فائر ایمرجنسی سروس کی ٹیموں کو تعینات کر دیا گیا۔ بھاری بارش اور ریڈ الرٹ جاری کرنے بعد ضلعی انتظامیہ نے کل منگل کو ضلع اڈپی کے تمام اسکولوں اور کالجوں میں چھٹی کا اعلان کیا ہے۔
    
آج پیر کو بھاری برسات کے دوران سیلاب سے متاثرہ افراد کو بچانے کی کارروائی گونڈی بیل اور کرشنا مٹھ کے قریب والے علاقوں میں کی گئی ، جہاں ایک پیئنگ گیسٹ کی سہولت والے گھر میں پانی گھسنے کی وجہ سے طلبہ پھنس گئے تھے ۔ اس کے علاوہ فائر ایمرجنسی ٹیم نے ان علاقوں سے کئی مکینوں کو سیلابی پانی سے بچانے اور محفوظ مقام پر پہنچانے کی کارروائی انجام دی۔ گونڈی بیل میں پانی کی سطح خطرناک حد تک بڑھنے کے بعد فائر ایمرجنسی سروس کی ٹیمیں فوری طور پر حرکت میں آئی اور لوگوں کو متاثرہ علاقے سے نکالنے کا کام انجام دیا۔
    
اڈپی شہر میں بے شمار لوگ برساتی پانی میں گِھر گئے اور سڑکیں پوری طرح پانی میں ڈوب گئیں۔ اڈپی میونسپل کمشنر نے متاثرہ علاقے کا معائنہ کرتے ہوئے سیلابی صورتحال کا جائزہ لیا ہے۔ 
    
ضلع کے کئی مقامات پر سڑکیں پانی میں ڈوب گئیں ہیں۔ بہت سارے نشیبی علاقوں میں پانی کی سطح اچانک بڑھ گئی اور گھروں کے اندر سیلابی پانی گھس گیا۔ سڑکوں پر پانی اس حد تک بڑھ گیا کہ سڑکوں، نالوں اور ندیوں میں فرق کرنا ممکن نہیں رہا۔ 

صبح سے جاری مسلسل بارش رپورٹ لکھے جانے تک جاری تھی۔

ایک نظر اس پر بھی

دکشن کنڑا میں 83 مقامات پر بج رہی خطرے کی گھنٹی - موسلا دھار برسات سے کھسک سکتی ہیں چٹانیں 

کئی دنوں سے چل رہی مسلسل برسات کی وجہ سے جگہ جگہ چٹانیں کھسکنے کے واقعات پیش آ رہے ہیں ۔ اس وقت دکشن کنڑا میں 83 ایسے مقامات کی نشاندہی کی گئی ہے جہاں چٹانیں کھسکنے کا خطرہ سر پر منڈلا رہا ہے ۔    

 انکولہ میں زمین کھسکنے کا معاملہ : ضلع انتظامیہ نے کی ملبے میں ٹرک دبے ہونے کی تصدیق؛ کیا زندہ برآمد ہوگا لاری ڈرائیور ؟

انکولہ تعلقہ کے شیرور میں پیش آئے چٹان کھسکنے کے المیہ کے بارے میں مزید کچھ اہم باتیں سامنے آ رہی ہیں، جس سے یقین ہوگیا ہے کہ ملبے کے اندر ایک بینز ٹرک دبا ہے ۔ اس وجہ سے ملبے کے اندر ٹرک کا لا پتہ ڈرائیور بھی موجود ہونے کا قوی امکان ہے۔

کمٹہ تعلقہ میں بھاری برسات کے بعد چٹان کھسک گئی  

اتر کنڑا میں موسلا دھار برسات کے نتیجے میں انکولہ تعلقہ کے  شیرور میں بڑے پیمانے پر چٹان کھسکنے کا جان لیوا حادثہ پیش آنے کے بعد اب کمٹہ تعلقہ میں الورومٹھ  کے قریب بھی ایک بڑی چٹان کھسک گئی ۔ اس سے کمٹہ سداپور شاہراہ مکمل طور پر بند ہوگئی ہے ۔

اڈپی میں ڈینگی کے بڑھتے معاملے - ڈاکٹری نسخے کے بغیر پیراسیٹامول گولی کی فروخت پر لگی پابندی

ضلع میں ڈینگی اور دوسرے متعدی امراض میں روز بروز اضافہ ہوتا جا رہا ہے اور زیادہ تر مریض خود ہی اپنا علاج (سیلف میڈیکیشن) کرنے لگے ہیں ۔ اس کی وجہ سے امراض کی نامناسب تشخیص اور نامکمل علاج کا سلسلہ چل پڑا ہے جس کا نتیجہ کبھی کبھی جان لیوا ثابت ہوتا ہے ۔