منگلورو 7 / جولائی (ایس او نیوز)جس طرح اُترکنڑا میں اتوار کو زبردست بارش  ہوئی ہے اور  بارش کا سلسلہ لگاتار جاری ہے، پڑوسی ضلع اُڈپی  اوردکشن کنڑا میں بھی زبردست بارش نے معمولات زندگی کو درہم برہم کر دیا ہے ۔ 

    محکمہ موسمیات نے ساحلی اضلاع کے لئے 7 جولائی سے 9 جولائی تک ایلو الرٹ جاری کررکھا ہے ، لیکن آج کی بارش  یلو الرٹ سے بھی زیادہ   نظر آئی ہے۔ منگلورو شہر میں بھاری برسات کی وجہ سے عام زندگی بری طرح متاثر رہی ۔ کوڈاجے - اننت واڑی روڈ پر گولی کٹے علاقے میں ایک کار کے اوپر درخت گرنے سے کار کو نقصان پہنچا، البتہ کسی قسم کا جسمانی نقصان نہیں ہوا ۔  کاشی بیٹو ہائی وے پر گندہ کیچڑ پھیل جانے سے موٹر گاڑیوں کی ٹریفک متاثر ہوئی ۔ 

 ُ   اڈپی ضلع میں مسلسل بھاری برسات کی وجہ سے کارکلا ، ہیبری اور اڈپی میں نشیبی علاقے برساتی پانی میں ڈوب گئے ہیں جبکہ  بجلی کی سپلائی بھی منقطع ہوئی  ہے۔

    مرونتے ساحل پر سمندری کٹاو کی صورتحال خراب ہوتی جا رہی ہے ۔ مرونتے جانے والی روڈ واقع  بوبرایا دئیوا ستھانا کے پاس سمندری کٹاو سے بچانے کے لئے ساحلی کنارے پر بچھائی گئی چٹانیں انتہائی تیز لہروں کی وجہ سے سمندر میں بہہ گئیں  ہیں اور اس وقت یہاں کی رکاوٹی دیوار پوری طرح گرنے کا خطرہ پیدا ہو گیا ہے جس کے بعد سڑک بھی سمندری لہروں کی نذر ہونے کا امکان ہے ۔ خیال رہے کہ تین سال قبل 'تاوکٹے طوفان' کے موقع پر بھی اس مقام پر اسی طرح کا خطرہ پیدا ہوگیا تھا ۔