بھٹکل 9/جون (ایس او نیوز) بھٹکل سمیت پورے ساحلی کرناٹکا میں دو دنوں سے زور دار بارش کا سلسلہ جاری ہے اور محکمہ موسمیات نے مزید اگلے پانچ دنوں تک بھاری بارش کی پیش گوئی کی ہے، اس درمیان آج اتوار کو چوبیس گھنٹوں کے لئے ساحلی اضلاع شمالی کینرا اور اڈپی میں ریڈ الرٹ جاری کیا گیا ہے۔
ریاست میں امسال 7 جون سے ہی مانسون کی بارش ہو رہی ہے لیکن زبردست بارش نے بعض اضلاع میں عام زندگی کے نظام کو درہم برہم کردیا ہے۔
محکمہ موسمیات نے بتایا کہ بھاری بارش کے پیش نظر کرناٹک کے شمالی داخلہ کے اضلاع بیلگام، دھارواڑ اور گدگ کے لیے اورینج الرٹ جاری کیا گیا ہے، ساحلی ضلع دکشن کنڑ سمیت ریاست کے باگل کوٹ، کوپل، رائچور، وجئے پور، چکبالا پور، چتردرگا، داونگیرے، شیموگہ اضلاع کے لیے ایلو الرٹ کا اعلان کیا گیا ہے۔
محکمہ موسمیات کے مطابق 9 جون کو جنوبی کنڑا ضلع میں گرج چمک کے ساتھ موسلادھار بارش ہوں گی۔ اسی طرح بیلگاوی، گدگ، دھارواڑ، ہاویری اضلاع میں بھی گرج چمک کے ساتھ موسلادھار بارش کا امکان ہے۔ باگل کوٹ، کوپل، رائچور، وجئے پور اضلاع میں ہوا کی رفتار 40 سے 50 کلومیٹر فی گھنٹہ اور گرج چمک کے ساتھ بارش ہونے کا خدشہ ہے۔
شیموگہ، چکبالاپور، چتردرگا، داونگیرے اضلاع میں طوفانی بارش ہونے کا امکان ہے، کرناٹک کے شمالی اندرونی علاقوں میں زیادہ تر مقامات پر درمیانی درجہ کی بارش ہونے کا امکان ہے جہاں کوئی الرٹ نہیں دیا گیا ہے اور جنوبی اندرونی علاقوں کے باقی اضلاع میں بھی عام بارش ہوگی۔
ماہی گیروں کو وارننگ: محکمہ موسمیات کے مطابق ساحلی اضلاع میں45 کلومیٹر فی گھنٹہ۔ سے 55 کلومیٹر فی گھنٹہ کی رفتار سے طوفانی ہوائیں چلنے کا امکان ہے، جس کو دیکھتے ہوئے ساحلی اضلاع کے ماہی گیروں کو خبردار کیا گیا ہے کہ وہ سمندر میں جانے سے گریز کریں۔
بنگلور شہر اور آس پاس کے علاقوں میں اگلے 24 گھنٹوں تک بادل چھائے رہیں گے۔ ہلکی سے درمیانی بارش کا امکان ہے۔ محکمہ موسمیات کا کہنا ہے کہ زیادہ سے زیادہ اور کم سے کم درجہ حرارت بالترتیب 31 ڈگری اور 21 ڈگری رہے گا۔