بھٹکل 11/ اپریل (ایس او نیوز) پی یو سی سال دوم کے   طلبہ کو جوابی پرچہ کی نقل کے لیے درخواست دینے ، ڈاؤن لوڈ کرنے اور دوبارہ جانچ اور دوبارہ گنتی کے لیے درخواست دینے کا موقع فراہم کیا گیا ہے۔ محکمہ تعلیمات کی جانب سے کہا گیا ہے کہ   جوابی پر چہ ڈاؤن لوڈ کرنے اور دوبارہ جانچ کے لیے درخواست دینے کے لیے 20 اپریل تک کا وقت دیا گیا ہے۔جوابی پرچہ کی اسکین کاپی کے لیے درخواست دینے کا موقع 10 اپریل سے 16 اپریل تک فراہم کیا گیا ہے۔ 14 اپریل سے 19 اپریل تک جوابی پرچہ کی اسکین شدہ کاپی ڈاؤن لوڈ کی جاسکے گی۔

14 اپریل سے 20 اپریل تک دوبارہ تشخیص اور دوبارہ گنتی کے لیے درخواست دینے کی اجازت ہے۔ جوابی شیٹ کی اسکین کاپی اور ری ویلیوایشن فیس کی ادائیگی کے لیے چالان کے ذریعے ادائیگی کی سہولت آن لائن اور آف لائن دونوں دستیاب ہے۔

بتاتے چلیں کہ سکینڈ پی یوسی میں  پہلی کوشش میں ناکام ہونے والے طلبہ کو اِس بار گھبرانے کی ضرورت نہیں ہے، محکمہ تعلیم نے سال خراب ہونے سے بچانے کے لئے سکینڈ پی یوسی(امتحان 2) کے انعقاد کے ساتھ امتحان 3 کی بھی سہولت فراہم کی ہے۔  یعنی اس بار طلبہ کو سکینڈ پی یو سی کا امتحان پاس کرانے کے لئے تین   تین مواقع دئے گئے ہیں۔

یاد رہے کہ امتحان 2 کی درخواست کے لیے کسی امیدوار کو دوبارہ تشخیص کے نتائج کا انتظار کرنے کی ضرورت نہیں ہے۔ محکمہ تعلیم نے واضح کیا ہے کہ  کسی بھی صورت میں کرناٹک پری یونیورسٹی کورس ایس ایل پی ای 1997 ، 29 (A) کے مطابق پہلے حاصل کردہ نمبروں کو دوبارہ جانچ کے بعد بحال نہیں کیا جا سکے گا۔ صرف دوبارہ جانچ میں حاصل کردہ نمبروں کو ہی امتحان ۔1 کے نمبروں کے طور پر سمجھا جائے گا۔ محکمہ تعلیم  نے اس بات کی بھی وضاحت کی ہے کہ جائزہ کمیٹی کا فیصلہ حتمی ہوگا اور کسی اپیل پر غور نہیں کیا جائے گا۔