بھٹکل 24 نومبر (ایس او نیوز)بھٹکل تعلقہ کے وینکٹاپور ندی میں مچھلیوں کے شکار کے لئے بچھائے گئے جال کو  کاٹ کر مچھلیوں کی چوری کی واردات پیش آئی ہے۔ بتایا گیا ہے کہ کم و بیش ڈیڑھ لاکھ مالیت کی مچھلیوں کو چرایا گیا ہے، ساتھ ساتھ بچھائی گئی جال کو بھی کاٹ کر نقصان پہنچایا گیا ہے۔

تینگنگونڈی کے رہنے والے  لنگیّا موگیر نے بھٹکل مضافاتی پولس تھانہ میں درج اپنی شکایت میں کہا ہے کہ  ہمیشہ کی طرح اس نے وینکٹاپور ندی میں مچھلیوں کے شکار کے لئے جال بچھایا تھا، مگر  آج بچھائے گئے جال کو ہی کسی نے کاٹ کر جال میں پھنسنے والی مچھلیوں کو بھی چرالیا ہے۔ 

پولس نے اس تعلق سے معاملہ درج کیا ہے، اور چھان بین جاری ہے۔