ہوناور: بس کنڈکٹر اور پولیس اہلکار پر حملہ کرنے کے الزام میں خاتون ہوم گارڈ گرفتار
ہوناور، 3 / اپریل (ایس او نیوز) ہوناور پولیس نے بس کنڈکٹر اور پولیس اہلکار پر حملہ کرنے کے الزام میں ایک خاتون ہوم گارڈ کو گرفتار کیا ہے جس نام یمونا مکھری ہے ۔
ہوناور تعلقہ کے کرکی میں رہنے والی یمونا مکھری نے کے ایس آر ٹی سی بس پر کمٹہ سے سفر کے دوران مفت سفر کے لئے اصول کے مطابق آدھار کارڈ طلب کرنے پر بس کنڈکٹر سے نہ صرف گالی گلوچ کی بلکہ اسے تھپڑ بھی مارا ۔ کنڈکٹر جب بس کو پولیس اسٹیشن لے گیا اور وہاں یمونا کی شکایت درج کروانے لگا تو یمونا نے وہاں بھی جھگڑا اور ہنگامہ کھڑا کیا ۔ جب خاتون پولیس سب انسپکٹر سنگیتا نے بیچ بچاو کرنے کی کوشش کی تو یمونا نے مبینہ طور پر اس پر بھی حملہ کر دیا ۔ جس کے بعد پولیس نے یمونا کے خلاف مارپیٹ اور سرکاری اہلکار کو اپنے فرائض انجام دینے کی راہ میں رکاوٹ پیدا کرنے کے الزام میں کیس درج کرتے ہوئے اسے گرفتار کر لیا ۔
بتایا جاتا ہے کہ یمونا کی طرف سے اس طرح کی ہنگامہ آرائی کا یہ کوئی پہلا معاملہ نہیں ہے ۔ اس سے قبل گوکرن میں ایک سیاح کے ساتھ بد سلوکی کے الزام میں اس پر معاملہ درج ہو چکا ہے ۔ اس کے علاوہ مرڈیشور میں ایک پولیس اہلکار پر بھی حملے کا کیس اس پر درج ہو چکا ہے ۔
ایک پولیس اہلکار نے بتایا کہ کئی مواقع پر یمونا کو اس کی بد سلوکی اور غلط رویے کے خلاف تبنیہ کی جا چکی ہے، مگر ایسا لگتا ہے کہ وہ اپنی عادت سے مجبور ہے جس کی وجہ سے وہ کوئی نہ کوئی نیا بکھیڑا کھڑا کر دیتی ہے ۔