اسمبلی اسپیکر یو ٹی قادر کا اپنے آبائی شہر مینگلور میں پرجوش استقبال
منگلورو 26 / مئی (ایس او نیوز) کرناٹکا اسمبلی اسپیکر کے منصب پر فائز ہونے کے بعد پہلی مرتبہ اپنے آبائی شہر آنے پر یو ٹی قادر کا پرجوش استقبال کیا گیا ۔
اپنے حلقہ کے عوام اور حامیوں سے ملاقات کے بعد اخباری نمائندوں سے بات چیت کرتے ہوئے انہوں نے کہا کہ اسپیکر کے عہدے پر فائز ہونے کی وجہ سے عوام کو اور بالخصوص میرے حلقہ کے رائے دہندگان کو مجھ سے رابطہ کرنے میں کوئی دشواری پیش نہیں آئے گی ۔ عوامی مسائل حل کرنے اور غریبوں اور بے بسوں کی مشکلات دور کرنے کے لئے میرے دفتر کے دروازے ہمیشہ کھلے رہیں گے ۔ میں نے افسران کو ہدایت دے رکھی ہے کہ مجھ سے ملاقات کے لئے آنے والوں کو پروٹوکول کے نام پر بلاوجہ تنگ نہ کیا جائے ۔ عام لوگوں کا پیار اور ان کا اعتماد ہی میرا پروٹوکول ہے۔
انہوں نے کہا کہ میں اس بات کا پورا خیال رکھوں کا کہ میرے حلقہ کے لوگوں نے مجھ پر جو اعتماد اور بھروسہ دکھایا ہے اسے دھکا نہ پہنچے ۔ اسپیکر کے منصب کا جو وقار ہے، وہ برقرار رہے ۔ اسمبلی میں جو نئے اراکین شامل ہوئے ہیں انہیں اسمبلی کی کارروائی ، ضوابط ، اراکین کے حقوق وفرائض وغیرہ سے متعلق جانکاری اور تربیت دینے کے علاوہ ان نئے اراکین اسمبلی کے صلاحیتوں کو اجاگر کرنے کے لئے پروگرام وضع کیا جائے گا ۔
یو ٹی قادر سے جب پوچھا گیا کہ اکثر سینئر اراکین کو ہی اسمبلی کا اسپیکر چنا جاتا ہے مگر آپ ابھی کم عمر ہونے کے باوجود آپ کو کیسے یہ عہدہ دیا گیا تو انہوں نے جواب دیا کہ یہ میری پارٹی کے ہائی کمان کا فیصلہ ہے ۔ میں عمر میں چھوٹا ہو سکتا ہوں مگر تجربہ کے اعتبار سے سینئر ہوں ۔ میں نے سیاسی زندگی میں اپنی عمر سے زیادہ بڑا تجربہ حاصل کیا ہے ۔
انہوں نے کہا کہ مجھے وزارت کا منصب نہ ملنے کی وجہ سے لوگوں کو مایوس ہونے کی ضرورت نہیں ہے ۔ یہ عہدہ کسی وزارت سے کہیں زیادہ بڑا ہوتا ہے ۔ ایک وزیر صرف اپنے حلقہ تک محدود رہتا ہے مگر ایک اسپیکر کے دائرہ کار میں تمام حلقے اور محکمہ جات ہوتے ہیں ۔ اس لئے اپنے حلقہ کے کام آنا اور مسائل حل کرنا میرے لئے مزید آسان ہوگا ۔