جالندھر، 26/مئی (ایس او نیوز/ایجنسی) کئی بار خلیجی ممالک میں ملازمت کے نام پر لوگوں کو دھوکہ دہی کا سامنا کرنا پڑتا ہے۔ ایسے ہی کچھ معاملات پنجاب کی خواتین کے ساتھ پیش آئے ہیں۔ میڈیا رپورٹس کے مطابق دھوکہ دہی کی شکار اور مسقط میں پھنسی کچھ خواتین کو وزارت خارجہ کی کوششوں کے بعد وطن واپس لایا گیا ہے۔ اب تک پنجاب کی 8 خواتین کی واپسی ہو چکی ہے اور بتایا جاتا ہے کہ یہ کامیابی عام آدمی پارٹی کے راجیہ سبھا رکن وکرم جیت سنگھ ساہنی کی کوششوں سے ممکن ہو پائی ہے۔

موصولہ خبروں میں بتایا جا رہا ہے کہ وکرم جیت سنگھ مشرق وسطیٰ میں پھنسی پنجابی خواتین کی وطن واپسی کے لیے سرگرم طریقے سے کوششیں کر رہے ہیں۔ انھوں نے گزشتہ دو ہفتوں میں ہی 15 خواتین کو گھر واپس آنے میں مدد کی ہے۔ مزید 18 خواتین کو مسقط سے واپس لانے کی کوششیں ہنوز جاری ہیں۔ ان خواتین نے رکن پارلیمنٹ وکرم جیت سنگھ سے گزارش کی ہے کہ وہ جلد از جلد گھر واپسی کے لیے راستہ ہموار کرائیں۔

وکرم جیت سنگھ نے باہر پھنسی پنجاب کی خواتین کو واپس لانے کی مہم کو ’ہوپ‘ (امید) نام دیا ہے۔ اس کا مقصد باہر ممالک میں پھنسی پنجابی خواتین کو جلد از جلد ملک واپس لانا ہے۔ اس مشن کے تحت پچھلے دو ہفتوں میں 7 لڑکیوں کو بہ حفاظت ملک لایا گیا تھا، اور آج 8 لڑکیاں ہندوستان واپس آئی ہیں۔ اس تعلق سے وکرم جیت سنگھ نے بتایا کہ ان خواتین کو بے ایمان ایجنٹوں اور فرضی صلاح کاروں کے ذریعہ بہکایا گیا تھا اور ان سے عمان میں ملازمت دلانے کا وعدہ کیا گیا تھا۔