بھٹکل 15 اپریل (ایس او نیوز) ورکنگ جرنلسٹ اسوسی ایشن   بھٹکل  کے مسلم رپورٹروں کی طرف سے بھٹکل کے غیر مسلم رپورٹروں کو عید الفطر کی مناسبت سے مٹھائیاں تقسیم کی گئیں اور اُنہیں عید کے تعلق سے  معلومات فراہم کی گئیں۔

اسوسی ایشن کے صدر جناب محمد رضا مانوی نے بہ زبان کنڑا اخبارنویسوں سے خطاب کرتے ہوئے  رمضان کے روزوں کے تعلق سے معلومات فراہم کرتے ہوئے بتایا کہ ایک ماہ کے روزوں کے بعد اللہ تعالیٰ کی طرف سے  عید الفطر کا انعام دیا گیا ہے جس کے دوران  مسلمان  سب سے پہلے اللہ کا شکر بجالاتے ہیں۔ 

اسوسی ایشن کے ضلعی نائب صدر بھوانی شنکر اور  سابق ضلعی صدر رادھا کرشن بھٹ نے بھی اس موقع پر اپنے اپنے تا ثرات پیش کرتے ہوئے بتایا کہ مسلمان  پورا دن  بھوکے اور پیاسے رہ کر  جس طرح روزہ رکھتے ہیں، یہ ہر کسی کے  بس کی بات نہیں ہے، چونکہ مسلمان اسے  اپنا دینی  فریضہ سمجھ کر  انجام دیتے ہیں ،  ایسوں کو  اللہ کی طرف سے بھی   روزہ رکھنے کی طاقت    اور ہمت عطا ہوتی ہے۔ انہوں نے تمام  مسلمانوں کو اس موقع پر عید کی پرخلوص مبارکباد پیش کی۔ غیر مسلم اخباری رپورٹروں میں  موہن نائک،  ستیش کمار اور رگھویندرا ہیبار بھی موجود تھے۔