دبئی ۔ منگلورو فلائٹ میں بدتمیزی کرنے پر مسافر کو مینگلور ائرپورٹ پر اُترتے ہی کیا گیا گرفتار
منگلورو، 12/مئی (ایس اونیوز /ایجنسی) دبئی سے منگلورو اُڑان کے دوران فلائٹ میں بدتمیزی کرنے والے مسافر کو مینگلور ائرپورٹ پر اُترتے ہی گرفتار کرلیا گیا اور اُس کے خلاف ایر انڈیا ایکسپریس کے عملہ کی شکایت پر ایف آئی آر درج کرلی گئی ۔
فلائٹ کے سیکورٹی کوآرڈینیٹر سدھارتھ داس نے محمد بی سی کے خلاف بجپے پولیس اسٹیشن میں شکایت درج کروائی۔ یہ واقعہ 9/ مئی کی صبح کا ہے اور اسی شام ایف آئی آر درج کی گئی ہے۔
ذرائع سے ملی اطلاع کے مطابق پڑوسی ریاست کیرالہ کے کنوّ ر کے رہنے والے محمد بی سی نے 8/ مئی کی رات ایرانڈیا ایکسپریس فلائٹ میں دبئی سے منگلورو کا سفر کیا اور اگلے دن صبح 7:30بجے منگلورو انٹرنیشنل ایرپورٹ پہنچا۔ اس پر الزام ہے کہ فلائٹ کے دبئی سے پرواز کرنے کے بعد محمد ٹوائلٹ گیا تھا، پھر باہر نکالنے کے بعد عملہ کے ایک رکن سے کرشنا نامی شخص کے بارے میں دریافت کیا جس کے تعلق سے بتایا گیا ہے کہ وہ اس فلائٹ کی مسافرین کی فہرست میں نہیں تھا۔ جب عملہ نے اُسے بتایا کہ کرشنا نامی کوئی مسافر فلیٹ میں نہیں ہے تو اُس نے بے تکے سوالات کرکے اور غیرضروری طور پرکئی بار سرویس بٹن دباکرعملہ کو پریشان کرنا شروع کیا۔ پھر اس نے اپنی لائف جیکٹ نکالی اور عملہ کو دیتے ہوئے کہا کہ وہ اسے لینڈگ کے بعد استعمال کرے گا۔
پولس کے اعلیٰ ذرائع کے مطابق جب فلائٹ بحیرہ عرب کے اوپر سے پرواز کررہی تھی تو اس نے مبینہ طو رپر یہ بھی کہا کہ وہ فلائٹ سے باہر جانا چاہتا ہے ، اس بات سے فلائٹ کے اندر موجود دیگر مسافروں میں خوف وہراس پیدا ہوگیا۔