بنگلورو ،9/ جولائی (ایس او نیوز )  ریاستی وزیر صحت دنیش گنڈو راؤ نے کہا ہے کہ یہ سچ ہے کہ کرناٹک میں ڈینگو کے معاملات بڑھ رہے ہیں لیکن ایسی صورتحال نہیں ہے کہ میڈیکل ایمرجنسی کا اعلان کردیا جائے۔ 

اخباری نمائندوں سے بات کرتے ہوئے دنیش گنڈو راؤ نے کہا کہ ڈینگو مچھروں سے زیادہ تیز بی جے پی پھیلارہی ہے اور اس کی وجہ سے لوگوں کو دہشت زدہ کرنے کی کوشش کی جارہی ہے۔ انہوں نے کہا کی ڈینگو کی روک تھا م کیلئے جو بھی ممکن ہے حکومت وہ قدم اٹھارہی ہے۔ وزیر صحت نے کہا کہ ریاست میں ڈینگو کے علاج کے لئے اسپتالوں میں بستروں یا دواؤں کی کوئی کمی نہیں ہے۔ 

محکمہ صحت کی مشاورتی کمیٹی نے کہا ہے کہ ایسی صورتحال بالکل نہیں کہ میڈیکل ایمرجنسی کا اعلان کردیا جائے۔ انہوں نے کہا کہ عوام س کہا گیا ہے کہ وہ اپنے گھروں کے ارد گر د پانی جمع ہونے نہ دیں۔ مچھروں کی بھرمار کی شکایت جہاں جہاں ملی ہے وہاں  فاگنگ کروانے کی ہدایت دی جاچکی ہے۔ انہوں نے کہا کہ ریاست کے جن جن مقامات پر ڈینگو کے کیس زیادہ ہیں وہا فیورکلینک قائم کئے گئے ہیں۔ دنیش گنڈو راؤ نے کہا کہ اس بخار کو مزید پھیلنے سے روکنے کیلئے عوام کو محتاط ہونا چاہئے۔ 

دنیش گنڈو راؤ نے کہا کہ منگلورو کے ایک انٹر نیشنل معیار کے سویمنگ پول کے افتتاح کے موقع اس پول میں اتر کر  تیرنے پر ان کے خلاف بی جے پی نکتہ چینی کررہی ہے۔ لیکن بی جے پی نے اس بات پر کیوں توجہ  نہیں دی کہ منگلورو میں انہوں نے ڈینگو کی روک تھام کیلئے مہم کی شروعات کی لوگوں کے گھروں کا معائنہ کیا،ضلع کی ترقی کا جائزہ لیا۔ ان تمام کو چھوڑ کر بی جے پی کو محض سویمنگ پال نظر آیا۔ انہوں نے کہا کہ دکشن کنڑا ضلع کے انچارج وزیر ہونے کے ناطہ صبح 6 بجے وہ اس بین الاقوامی سویمنگ پول کے افتتاح کے لئے گئے تھے۔  بی جے پی والوں کی مانند ریسارٹ میں نہیں گئے تھے۔