کنداپور،  15 / اپریل (ایس او نیوز) دیش کا دستور وضع کرنے والے ڈاکٹر بھیم راو امبیڈکر کے 133 ویں جنم دن پر  کنداپور شاستری سرکل کے پاس منعقدہ دلت تنظیموں اور دیگر ہم خیال اداروں کی مشترکہ ریلی سے خطاب کرتے ہوئے سینئر دانشور پروفیسر فنی راج نے کہا کہ اس وقت ملک میں دستوری مراعات اور حقوق کو ختم کرنے کی کوشش کی جا رہی ہے ۔
    
پروفیسر فنی راج نے کہا کہ یہ جو ملک کا دستور ہے ، یہ صرف ایک کتاب نہیں ہے ، یہ عوامی زندگی سانس ہے ۔ آج کچھ لوگ اسی دستور کو تبدیل کرکے اس کی جگہ منو سمرتی کو ملک کا آئین بنانے کی بات کر رہے ہیں ۔ اس لئے ہماری پوری جد و جہد اس دستور حفاظت کے لئے ہونی چاہیے ۔ 
    
بیندور میں ریلی : کنداپور تعلقہ کے بیندور میں بھی دلت تنظیموں اور ہم خیال اداروں کی طرف سے سنیشور مندر کے روبرو ریلی کا انعقاد ہوا جسے اڈپی ضلع مسلم اوکوٹا کے صدر یاسین ملپے اور دلت سنگھرش سمیتی کے ضلع کنوینر سندر ماسٹر نے ہری جھنڈی دکھائی ۔ یہاں سے نکلنے والی ریلی کنداپور، برہماور، ہیبری، کارکلا، کاپو کے راستے سے ہوتی ہوئی اڈپی پہنچ گئی ۔