ممبئی، 5/مئی (ایس او نیوز /ایجنسی)  شیوسینا (یو بی ٹی) کے سربراہ ادھو ٹھاکرے نے کہا کہ بھارتیہ جنتا پارٹی آئین کو تبدیل کرنا چاہتی ہے۔ لیکن ہم اُن کی کوشش کو کامیاب ہونے نہیں دیں گے۔ آئین کو تبدیل کرنے کی کوشش کرنے پر صرف ہم اور ہماری پارٹی ہی نہیں  بلکہ پورا ملک اس کے خلاف اٹھ کھڑا ہوجائے گا۔ اُدھو ٹھاکرے نے کہا کہ  مرکزی ایجنسیاں بی جے پی کی ’نوکر‘ بن گئی ہیں۔ لیکن  4 جون کو نتائج  سامنے آنے کے بعد میری پارٹی کے لوگوں کو ہراساں کرنے والوں کو سود سمیت ہرجانہ ادا کرنا پڑے گا۔

مہاراشٹرا  کے دھاراشیو (عثمان آباد) میں ایک ریلی سے خطاب کرتے ہوئے انہوں نے کہا کہ بی جے پی آئین کو بدلنا چاہتی ہے۔ جس دن وہ آئین کو تبدیل کرنے کی کوشش کرے گی پورا ملک اس کے خلاف کھڑا ہو جائے گا۔ انہوں نے وزیر اعظم نریندر مودی کے بیان کا بھی ذکر کیا اور نشانہ بنایا جس میں وزیر اعظم نے کہا تھا کہ کانگریس لیڈر راہل گاندھی کو ہندوستان کا اگلا وزیر اعظم بنانے کے لیے  پاکستان  بے چین ہے۔

ادھو ٹھاکرے نے کہا کہ یہ بات ہندوستان کا وہ لیڈر کہہ رہا ہے جو پاکستان جا کر نواز شریف کے ساتھ کیک کھاکرآیا ہے۔ اس سے قبل کسی نے پاکستان جاکر کیک نہیں کھایا تھا۔ ادھو ٹھاکرے نے کسانوں سے مخاطب ہوتے ہوئے  کہا کہ انڈیا الائنس کی حکومت کے اقتدار میں آنے کے بعد زراعت کے لیے بیجوں اور فصلوں کو کیڑوں سے بچانے کی ادویات نیز دیگر زرعی آلات و ساز و سامان پر سے جی ایس ٹی ختم کر دیا جائے گا۔ انہوں نے کہا کہ جی ایس ٹی کے نظام میں اصلاحات کی جائیں گی اور ٹیکس کی دہشت گردی کو روکا جائے گا۔