بنگلورو ،21؍نومبر (ایس او نیوز؍ایجنسی) ملک اور ریاست میں برسر اقتدار بی جے پی کے لئے عوام کے مفادات سے کچھ لینا دینا نہیں۔ ہندو یا مسلمان جو بھی ہو ان تمام کے مذہبی جذبات کو بھڑکا کر بی جے پی صر ف اور صرف اس کے ذریعہ اقتدارپر اپنی پکڑ مضبوط کرنے کی کوشش کر رہی ہے۔یہ بات سابق ریاستی وزیر اور چامراج پیٹ حلقہ کے رکن اسمبلی بی زیڈ ضمیر احمد خان نے کہی۔

جمکھنڈی میں ایک بہت بڑے جلسہ عام سے خطاب کرتے ہوئے انہوں نے کہا کہ کانگریس پارٹی کی کوشش ہمیشہ سے یہی رہی ہے کہ تمام طبقات کو ساتھ میں لے کر آگے بڑھاجائے،جبکہ بی جے پی کی کوشش ہمیشہ سے دوسری سیاسی جماعتو ں کو توڑ کر اقتدار پر قبضہ کرنا ہے۔

انہوں نے کہا کہ کانگریس ہمیشہ ریاست کی ترقی کے لئے فکر مند رہی ہے۔ انہوں نے کہا کہ مسلمانوں کو چاہئے کہ تمام برادران وطن کو ساتھ میں لے کر ریاست اور ملک کی ترقی کے لئے کام کریں۔ ایسی کوئی حرکت نہ کریں جس سے پوری قوم کو شرمندگی اٹھانی پڑے۔

انہوں نے کہا کہ سابق وزیر اعلیٰ سدارامیا کو اس بار بھی شمالی کرناٹک کے بادامی اسمبلی حلقہ سے ہی انتخاب لڑنا چاہئے۔ انہوں نے کہا کہ اس بار اس حلقہ سے سدارامیا کو از کم 50ہزار ووٹوں کی برتری سے کامیابی ہونی چاہئے۔

شمالی کرناٹک کے لئے بار بار آنے جانے کے لئے سدارامیا کو پریشانی کے بارے میں ضمیر احمد نے کہا کہ اس کے لئے مقامی لوگوں سے چندہ کر کے سدارامیا کے لئے ایک ہیلی کاپٹر خریدا جائے گا،تاکہ وہ آسانی سے آجا سکیں۔ اس موقع پر جمکھنڈی کے رکن اسمبلی آنند نیامے گوڑا نے ضمیر احمد خان کا پرزور استقبال کیا۔