خام تیل کی قیمت میں کمی، لیکن پٹرول اور ڈیزل کی قیمتیں چھو رہی ہیں آسمان: ملکارجن کھرگے
نئی دہلی،18؍جنوری (ایس او نیوز؍ایجنسی) ملک میں مہنگائی نے عام لوگوں کا جینا محال کر دیا ہے۔ پٹرول اور ڈیزل کی قیمتیں آسمان کو چھو رہی ہیں۔ ظاہر ہے تیل کی قیمتوں میں اضافے سے مہنگائی بھی بڑھی ہے۔ اس سب کے درمیان حکومت خاموش ہے۔ کانگریس صدر ملکارجن کھرگے نے پٹرول اور ڈیزل کی قیمتوں کو لے کر مرکز کی مودی حکومت کو نشانہ بنایا ہے۔
کانگریس صدر نے ٹوئٹ کیا، ''خام تیل کی قیمتیں زمین پر ہیں، لیکن پٹرول اور ڈیزل کی قیمتیں آسمان کو چھو رہی ہیں۔ مودی حکومت = عوام سے لاکھوں کروڑوں کی لوٹ لامحدود!، کھڑگے نے اس ٹوئٹ کے ساتھ ایک گرافکس بھی شیئر کیا ہے۔ گرافکس بتاتے ہیں کہ کس طرح مودی حکومت تیل کے ذریعے ملک کے عوام کو 'کھلے عام لوٹ رہی ہے'۔ گرافکس میں دیئے گئے اعداد و شمار کے مطابق گزشتہ 7 ماہ میں خام تیل کی قیمت میں 32 فیصد کی کمی ہوئی ہے، اس کے باوجود مودی حکومت نے تیل کی قیمت میں کمی نہیں کی۔
اعداد و شمار کے مطابق اس وقت ممبئی میں پٹرول 106.31 روپے فی لیٹر اور ڈیزل 94.27 روپے فی لیٹر فروخت ہو رہا ہے۔ لیکن اس وقت عالمی منڈی میں خام تیل کی قیمت کے مطابق ملک کے عوام کو 18 روپے کم میں تیل دیا جا سکتا ہے۔ اعداد و شمار کے مطابق اگر حکومت چاہے تو عوام کو ریلیف دیتے ہوئے پٹرول 88 روپے 31 پیسے فی لیٹر اور ڈیزل 76 روپے 27 پیسے فی لیٹر دے سکتی ہے۔ لیکن حکومت ایسا نہیں کر رہی اور عوام کو مہنگے داموں میں تیل خریدنا پڑ رہا ہے۔
