داونگیرے،  25 / مئی (ایس او نیوز) داونگیرے کے چیناگیری شہر میں پولیس کی حراست میں ایک نوجوان کی موت واقع ہونے کے بعد لوگوں نے پرتشدد مظاہرہ کیا اور پولیس اسٹیشن پر حملہ کر دیا ۔ پتھراو کی وجہ سے پانچ  پولیس گاڑیوں کو نقصان پہنچنے کے علاوہ کئی 11 پولیس اہلکاورں کے زخمی ہونے کی بھی خبر ہے ۔
    
داونگیرے کے ایس پی اوما پرشانت نے بتایا کہ "چیناگیری غیرقانونی طریقے سے جوا (مٹکا) کھیلنے کے الزام میں ٹیپو نگر کے رہائشی  کل رات کوعادل (30 سال) نامی شخص کو پولیس اسٹیشن لایا گیا تھا ۔ پولیس اسٹیشن کے اندر وہ اچانک بے ہوش ہو کر گر پڑا تو اسے فوری طور پر اسپتال لے جایا گیا ۔ وہاں پر ڈاکٹروں نے اس کی موت واقع ہونے کی تصدیق کی ۔ حالانکہ عادل چھ سے سات منٹ سے زیادہ وقفے تک پولیس اسٹیشن کے اندر رہا نہیں تھا مگر عادل کے رشتے داروں کا دعویٰ ہے کہ عادل کی موت پولیس حراست میں ہوئی ہے ۔" 
    
ایس پی نے بتایا کہ پولیس اسٹیشن کے اندر سی سی ٹی وی کیمرہ موجود ہے ۔ عادل کے والد کی طرف سے درج کی گئی شکایت پر تحقیقات کی جائیں گی ۔ اس معاملے کی سنگینی کو دیکھتے ہوئے لاش کا پوسٹ مارٹم داونگیرے ضلع اسپتال میں مجسٹریٹ کی موجودگی میں کیا جائے گا ۔ 
    
معلوم ہوا ہے کہ پرتشدد کے بعد شہر میں سخت کشیدگی ہے ۔ سیکیوریٹی بندوبست سخت کر دیا گیا ہے ۔ پڑوسی اضلاع سے پولیس کی اضافی کمک طلب کر لی گئی ہے ۔ پولیس نے مظاہرین کے خلاف بھی معاملے درج کیے ہیں ۔