بنگلورو ،28 فروری (ایس او نیوز/ایجنسی) راجیہ سبھا انتخابات کا نتیجہ ظاہر ہونے پر کانگریس کے تین امیدواروں کی کامیابی کا آج ودھان سودھا کے لاؤنج میں جشن کے دوران ناصر حسین کا ایک حامی نو جوان ، جو ان سے قریب تھا، اس پر الزام ہے کہ اس نے پاکستان زندہ باد کا نعرہ لگایا۔ اس پر یہ بھی الزام ہے کہ اس نے دو مرتبہ یہ نعرہ لگایا۔ چینلوں اور سوشیل میڈیا پر اس واقعہ کا خوب چرچا ہورہا ہے ۔ راجیہ سبھا انتخابات کا نتیجہ ظاہر ہونے کے بعد ناصر حسین و دھان سودھا کی لاؤنج میں میڈیا سے بات کر رہے تھے۔ اسی دوران ایک نوجوان جو ناصر حسین سے چپکے کھڑا تھا پاکستان زندہ آباد کا نعرہ لگایا۔ ہمیشہ کی طرح اس واقعہ کو سنجیدہ لیتے ہوئے بی جے پی رکن اسمبلی ایس روی کمار نے پاکستان زندہ آباد کہنے والے کو فوری گرفتار کرنے کا مطالبہ کیا ہے ۔ اس مجموعہ میں ناصر حسین کے علاوہ کانگریس امیدواروں کے سینکڑوں حامی بھی تھے۔ ان کا کہنا ہے کہ ناصر حسین کے حامیوں نے ناصر حسین زندہ باد کہا تھا جس کو چند لوگوں نے پاکستان زندہ آباد تصور کر لیا ہے اور میڈیا میں اس کو خوب اچھالا جا رہا ہے ۔ انہوں نے یہ بھی کہا کہ ملک بالخصوص کرناٹک کے موجودہ حالات کو دیکھتے ہوئے کوئی ناصر حسین کا حامی پاکستان زندہ آباد کا نعرہ لگانے کی جرات نہیں کر سکتا۔ ایسا بھی ہو سکتا ہے کہ ناصر حسین کے کسی سیاسی حریف نے انہیں بدنام کرنے کے مقصد سے یہ نعرہ لگایا ہوگا ۔ اس اصل ملزم کا پتہ لگا کر اس کے خلاف قانونی کارروائی کی جائے۔