پٹنہ،19/مارچ (ایس او نیوز/ایجنسی) حکومت بہار نے مسلمان ملازمین کو رعایت دیتے ہوئے کہا ہے کہ وہ ماہِ رمضان کے دوران دفتر وقت سے ایک گھنٹہ پہلے آ سکتے ہیں اور اپنے مقررہ وقت سے ایک گھنٹہ پہلے دفتر سے واپس جا سکتے ہیں۔ محکمہ جنرل ایڈمنسٹریشن نے جمعہ کو ایک حکم نامہ جاری کرتے ہوئے کہا کہ حکومت کی جانب سے مسلم ملازمین اور عہدیداروں کی سہولت کے پیش نظر رمضان کے دوران مقررہ وقت سے ایک گھنٹہ پہلے دفتر آنے اور مقررہ وقت سے ایک گھنٹہ پہلے دفتر سے نکلنے کی اجازت دی جاتی ہے۔

حکم نامہ میں کہا گیا ہے کہ یہ حکم مستقل طور پر ہر سال کے لئے نافذ العمل رہے گا۔ بہار کے جنرل ایڈمنسٹریشن ڈیپارٹمنٹ کی جانب سے یہ حکم تمام محکموں، ان کے سربراہوں، ڈائریکٹر جنرل آف پولیس، کمشنروں اور ضلعی افسران کو بھیج دیا گیا ہے۔ اس حکم کا اطلاق کنٹریکٹ پر کام کرنے والے ملازمین پر بھی ہوگا۔

حکم نامہ میں مزید کہا گیا ہے کہ جہاں بائیو میٹرک حاضری کا نظام نافذ ہے، اس حکم کے مطابق ان کی حاضری کو نشان زد کیا جائے گا یعنی مسلم ملازمین ایک گھنٹہ پہلے حاضری مارک کر سکیں گے۔ وہیں، بی جے پی نے حکومت کے اس حکم کو غیر منصفانہ قرار دیا ہے۔ بی جے پی کے ترجمان نکھل آنند نے کہا کہ حکومت مذہب کی بنیاد پر لوگوں کو تقسیم کرنا چاہتی ہے۔

انہوں نے سوال کیا کہ کیا حکومت نے دیگر مذاہب کے تہواروں میں بھی اسی طرح کی ریلیف دینے کا منصوبہ بنایا ہے؟ انہوں نے کہا کہ پہلے ہی سیمانچل علاقوں کے اردو اسکولوں سمیت کئی اسکولوں میں جمعہ کو ہفتہ وار چھٹی ہوتی ہے۔ انہوں نے کہا کہ یہ ووٹ بینک کو پیغام دینے کی اوچھی سیاست ہے، اسے جائز قرار نہیں دیا جا سکتا۔