بھٹکل میں مشکوک گوشت؛ تنظیم نے لگائی بیف کی خریداری پرعارضی پابندی

Source: S.O. News Service | By I.G. Bhatkali | Published on 3rd December 2023, 10:17 PM | ساحلی خبریں |

 بھٹکل 3/ ڈسمبر (ایس او نیوز) بھٹکل میں مشکوک مویشی کے گوشت کی خرید و فروخت  کی خبروں پر کارروائی کرتے ہوئے قومی سماجی ادارہ مجلس اصلاح وتنظیم نے بھٹکل کے تمام مسلمانوں سے اپیل کی ہے کہ وہ تنظیم کی طرف سے کئے جانے والے اگلے اعلان تک بڑے کے گوشت کی خریداری کو مکمل بند کریں اور اُس وقت تک گوشت نہ کھائیں جب تک مشکوک اور مشتبہ گوشت کی سپلائی پر مکمل طور پرروک نہیں لگائی جاتی۔

یاد رہے کہ حالیہ ہفتوں میں شہر میں سوشل میڈیا پر چوری شدہ مویشیوں اورغیرقانونی طور پرحاصل کردہ مویشیوں کے گوشت کی تجارت کی خبریں عام ہورہی تھی جس کی وجہ سے شہر کے ذمہ داران تشویش میں مبتلا تھے ۔ بالآخر آثار و شواہد کا جائزہ لیتے ہوئے اورعوام کو جانے انجانے میں مشکوک اورحرام گوشت کھانے سے باز رکھنے کے لئے تنظیم نے یہ فیصلہ کیا کہ  کچھ دنوں کے لئے بڑے کے گوشت کی خرید فروخت پر مکمل پابندی عائد کی جائے۔

پتہ چلا ہے کہ گٓذشتہ روز شہر کے قاضی صاحبان، علمائے کرام اور مجلس اصلاح و تنظیم کے ذمہ داران نے گوشت کے کاروباریوں کے ساتھ  میٹنگ منعقد کرکے حالات کا جائزہ لیا تھا۔  جس میں یہ بات عیاں ہوگئی کہ گوشت کے کچھ کاروباریوں  کے رابطے مشکوک افراد سے ہیں اوران کا لین دین شک و شبہ سے پاک نہیں ہے۔ جس کے بعد مشکوک گوشت کی خرید وفروخت پر گہری تشویش ظاہر کی گئی اور اس بات کی سخت تاکید کی گئی کہ پاک اور حلال گوشت فروخت ہونا ضروری ہے ورنہ حرام گوشت بیچنا بالکل گوارہ نہیں کیا جائے گا۔ اس موقع پر قاضی صاحبان کی ہدایت پر عمل کرتے ہوئے تنظیم نے عوام کو حرام غذا سے بچاتے ہوئے اور حرام کاروبارپر روک لگانے کے لئے فوری طور پر عوام کے لئے اپیل جاری کی کہ وہ عارضی طور پر بڑے کا گوشت نہ کھائیں اور حرام لین دین پر مکمل لگام کسنے کے لئے تنظیم کے ساتھ تعاون کریں۔

صورتحال کو سدھارنے کے لیے تنظیم نے ایک کمیٹی بھی تشکیل دی ہے جسے گوشت کے کاروبار کو صحیح حالت میں بحال کرنے کا کام سونپا گیا ہے۔ اس میں مشکوک جانوروں کے ذبح اور مشکوک گوشت کی سپلائی کو روکنا بھی شامل ہے۔ کمیٹی کو دس دن کے اندر اندر تمام اُمور کو انجام دینے کی ہدایت بھی دی گئی ہے۔

Bhatkal Tanzeem urges Muslims to refrain from beef consumption; Enforces temporary ban for suspicious meat probe

ایک نظر اس پر بھی

کاروار کے سمندر میں لگا ہوا 'رڈار' بھی چوروں کے ہاتھ سے بچ نہ سکا !

زمین پر سے قیمتی مشینیں چرانے والوں نے اب سمندر میں اپنے ہاتھ کی صفائی دکھانا شروع کیا ہے جس کی تازہ ترین مثال ماحولیاتی تبدیلیوں کے سگنل فراہم کرنے کے لئے کاروار کے علاقے میں بحیرہ عرب میں لگائے گئے 'رڈار' کی چوری ہے ۔

کمٹہ کے سمندر میں چینی جہاز کا معاملہ - کوسٹ گارڈ نے کہا : ہندوستانی حدود کی خلاف ورزی نہیں ہوئی

دو دن قبل کمٹہ کے قریب ہندوستانی سمندری سرحد میں چینی جہاز کی موجودگی اور اس سے ساحلی سیکیوریٹی کو درپیش خطرے کے تعلق سے جو خبریں عام ہوئی تھیں اس پر کوسٹ گارڈ نے بتایا ہے کہ یہ ایک جھوٹی خبر تھی اور چینی جہاز ہندوستانی سرحد میں داخل نہیں ہوا تھا ۔

ہوناور کاسرکوڈ میں ماہی گیروں پر زیادتیوں کے خلاف حقوق انسانی کمیشن سے کی گئی شکایت

ہوناور کے کاسرکوڈ ٹونکا میں مجوزہ تجارتی بندرگاہ کی تعمیر کے خلاف احتجاج کرنے والے مقامی ماہی گیروں  پر پولیس کی طرف سے لاٹھی، خواتین سمیت کئی لوگوں کی گرفتاریاں ، جھوٹے مقدمات کی شکل میں جو زیادتیاں ہوئی تھیں، اس کے تعلق سے حقوق انسانی کمیشن سے شکایت کی گئی ہے ۔

بھٹکل میں 'ریت مافیا' کا دربار - تعلقہ انتظامیہ خاموش - عوام بے بس اور لاچار

بھٹکل میں تعلقہ انتظامیہ کی خاموشی کی وجہ سے تعلقہ کے گورٹے، بیلکے، جالی، مُنڈلی نستار، بئیلور جیسے علاقوں میں ساحل سے ریت جیسی سمندری دولت لوٹنے کا کام 'ریت مافیا' کی طرف سے بلا روک ٹوک جاری ہے اور مقامی عوام پریشانی اور بے بسی و لاچاری سے یہ سب دیکھنے پر مجبور ہوگئے ہیں ۔