بھٹکل: شرالی کی خاتون نےپنکھا سے لٹک کر کی خودکشی؛ شوہرسمیت پانچ لوگوں کے خلاف معاملہ ہوا درج
بھٹکل 8 فروری (ایس او نیوز) شرالی نیل کنٹھ کراس کی ایک 36 سالہ شادی شدہ خاتون نے اپنی ہی ماں کے گھر کے کمرے میں پنکھا سے لٹک کر خودکشی کرلی جس کی شناخت سری دیوی بھاسکر موگیر کی حیثیت سے کی گئی ہے۔ بتایا گیا ہے کہ آٹھ سال قبل اس کی شادی مرڈیشور مٹادی ہیتلو کے رہنے والے بھاسکر موگیر سے ہوئی تھی، مگر شادی کے دوسال بعد ہی وہ شوہر کے ظلم سے پریشان ہوکر اپنی ماں کےگھر آگئی تھی۔
پتہ چلا ہے کہ خاتون کو ایک بیٹا ہے جبکہ چھ سال قبل خاتون نے مرڈیشور پولس تھانہ پہنچ کر اپنے شوہر کے خلاف ذہنی طور پر اذیت دینے کا الزام عائد کرتے ہوئے شکایت درج کی تھی، اور حال ہی میں یعنی 27 جنوری کو معاملہ بھٹکل عدالت میں چلا تھا۔ جس کے دوران شوہر نے عدالت کے باہر آکر اس سے کہا تھا کہ بیٹا اُسے کسی بھی حال میں نہیں ملے گا۔
مہلوک خاتون کےوالد سُکرپّا موگیر نے بھٹکل مضافاتی پولس تھانہ میں اپنے دامادبھاسکر موگیر کے خلاف شکایت درج کی ہے، اس کی دی ہوئی ذہنی اذیت سے تنگ آکر اس کی بیٹی سری دیوی نے خودکشی کی ہے۔ شکایت میں اپنی بیٹی پر ڈھائے جانے والے ظلم کے تعلق سے مادیو ناگپا موگیر، پدما ستیش موگیر، تُلسی داس ماستی موگیر اور للیتا تلسی داس موگیر پر بھی الزام عائد کیا ہے کہ ان چاروں نے بھاسکر موگیر کا ساتھ دیا تھا۔
بھٹکل مضافاتی پولس تھانہ میں معاملہ درج کیا گیا ہے اور پولس چھان بین کررہی ہے۔