بھٹکل 14 / جون (ایس او نیوز) بھٹکل تعلقہ ہاسپٹل کے ہال میں ایڈمنسٹریٹیو میڈیکل آفیسر ڈاکٹر سویتا کامت کی صدارت میں منعقدہ ہاسپٹل رکھشا سمیتی کی میٹنگ میں ضلع انچارج وزیر منکال وئیدیا نے تیقن دیا کہ یہاں 250 بستروں والا ہاسپٹل جلد ہی منظور ہو جائے گا۔

 ڈاکٹر سویتا کامت نے رکھشا سمیتی کے سامنے ہاسپٹل کے اخراجات کا حساب کتاب پیش کرتے ہوئے کہا کہ آیوشمان اسکیم کے تحت ہاسپٹل کو 1.46 کروڑ روپے موصول ہوئے تھے۔ اس فنڈ میں سے 1.38 کروڑ روپے خرچ ہوئے اور 8 لاکھ روپے باقی بچے ہیں۔ 

 ڈاکٹر سویتا نے ہاسپٹل کو درپیش مسائل کا تذکرہ کرتے ہوئے کہا کہ "ہاسپٹل میں آنے والے مریضوں کے لئے گاڑیاں پارک کرنے میں دشواری ہوتی ہے۔ بلڈ بینک عملہ نہ ہونے کی وجہ سے مریضوں کو درکار خون فراہم کرنا مشکل ہوگیا ہے۔ 

 اس موقع پر وزیر منکال وئیدیا نے کہا کہ ' سرکار سے جتنا فنڈ لانا ممکن ہے میں اتنا لانے کی کوشش کر رہا ہوں۔ آوٹ سورسنگ ٹھیکے پر کام کر رہے عملے کا معاوضہ بڑھانے پر غور کیا جا رہا ہے۔ اس اسپتال کو 250بستروں والے اسپتال میں تبدیل کرنے کے لئے گزشتہ دو سال سے جد و جہد کر رہا ہوں، لیکن سرکار سے منظوری حاصل کرنا ممکن نہیں ہوا۔ میری کوشش جاری ہے اور امید ہے کہ جلد ہی اسے منظوری مل جائے گی ۔"