بیلتھنگڈی: 25؍ مئی (ایس اؤ نیوز) بیلتھنگڈی پولس نے نفرت انگیز تقریر کرنے کے الزام میں رکن اسمبلی ہریش پونجا اور ایک شخص کے خلاف کیس درج کرلیا ہے۔ رکن اسمبلی ہریش پونجا نے اپنی ایک حالیہ تقریر میں وزیر اعلیٰ سدرامیاپر 24ہندوؤں کو قتل کرنے کا الزام لگایا تھا۔

بیلتھنگڈی کی نمیتا کے پجاری کی شکایت پر بیلتھنگڈی کی پولس نے اشتعال انگیز ی اور دو طبقات کے درمیان مذہبی اور نسلی نفرت پیدا کرنے کے الزام میں ہریش پونجا اور پروگرام کے منتظم جینت کوٹیان کے خلاف دفعہ 153،153(A) اور 505کے تحت کیس درج کرلیاہے۔

بیلتھنگڈی میں بی جے پی کی جانب سے 22مئی کو منعقدہ تہنیتی پروگرام میں رکن اسمبلی نے اپنی تقریر کے دوران بی جےپی کے سابق ضلعی یونٹ نگراں کار ستیہ جیت سورتکل کی طرف سے مخالف تشہیری مہم چلائے جانے پر سخت ناراضگی کا اظہار کیا تھا۔مبینہ طورپر  رکن اسمبلی نے کہاتھا کہ ’’ستیہ اناّ اگر میں نےہندوتوا کے ساتھ دھوکہ کیاہوتا اور تم میرے خلاف مہم چلاتے تو مجھے قبول تھا۔ میں اس وقت بھی راضی رہتاجب میں ہندوتوا نظریے کی خلاف ورزی کیا ہوتا۔ لیکن آج میں تم سے پوچھتا ہوں کہ تم نے سدرامیا کے حق میں آخر ووٹ کیسےمانگا، جو 24ہندوؤں کے قاتل ہیں؟۔ تم کیسے کانگریس کے حق میں ووٹ مانگتے ہو ، جس نے بجرنگ دل پر پابندی عائد کرنےکی بات کی ہے۔ بیلتھنگڈی کے عوام تم سے سوال کررہے ہیں کہ تم کس طرح کے  ہندوتوا پر عمل پیرا ہو ‘‘۔