یلاپور 14 / اپریل (ایس او نیوز) تعلقہ کے ساتوڈی آبشار کا نظارہ کرنے کے لئے آئے ہوئے سیاحوں پر شہد کی مکھیوں نے حملہ کر دیا ، جس کی وجہ سے 15 سے زائد سیاح زخمی ہوگئے ۔ ان میں سے چار افراد کی حالت سنگین ہونے کی خبر ہے ۔

 بتایا جاتا ہے کہ ساتوڈی آبشار کے آس پاس بڑی تعداد میں شہد کی مکھیوں کے چھتے پائے جاتے ہیں ، مگر عام طور پر مکھیاں سیاحوں پر حملہ نہیں کر تیں ۔ پرسوں پیش آئے معاملے میں مبینہ طور پر کچھ سیاحوں نے شہد کے چھتے پر پتھر پھینکا تو مکھیاں بپھر گئیں اور انہوں نے وہاں موجود لوگوں پر حملہ کر دیا ۔ جس کی وجہ سے سیاحوں نے یہاں وہاں بھاگ کر اپنی جان بچانے کی کوشش کی ۔ اس کے باوجود 15 سے زائد سیاح حملے کی زد میں آگئے ۔

 زخمیوں کو یلاپور سرکاری اسپتال میں داخل کیا گیا ہے اور چار افراد کی حالت سنگین ہونے کی وجہ سے انہیں مزید بہتر علاج کے لئے ہبلی اسپتال میں منتقل کیا گیا ہے ۔