انڈیا کو ہرا کر آسٹریلیا بن گیا چھٹی بارکرکٹ کا عالمی چیمپئن
احمد آباد 21/نومبر (ایس او نیوز): آئی سی سی ورلڈکپ میں آسٹریلیا نے انڈیا کو 6 وکٹوں سے شکست دیکر چھٹی بار کرکٹ کا عالمی چیمپئن بنے کا شرف حاصل کرلیا۔
احمد آباد کے نریندر مودی کرکٹ اسٹیڈیم میں کھیلے گئے آئی سی سی ورلڈ کپ 2023ء کے فائنل میں انڈیا کا 241 رنز کا ہدف آسٹریلیا نے 43 اوورز میں چار وکٹوں کے نقصان پر بنالیا۔
ٹریوس ہیڈ مین آف دی میچ جبکہ ویراٹ کوہلی ٹورنامنٹ کے بہترین کھلاڑی قرار پائے۔ ملک کے وزیراعظم نریندر مودی نے آسٹریلوی کپتان پیٹ کمنز کو ٹرافی پیش کی۔
آسٹریلیا کرکٹ ورلڈ کپ کی تاریخ میں سب سے زیادہ چھ بار چیمپئن بننے والی ٹیم بن گئی ہے جو اس سے قبل 1987، 1999، 2003، 2007 اور 2015 میں بھی ٹائٹل اپنے نام کرچکی ہے۔
واضح رہے کہ انڈیا کی یہ ٹورنامنٹ میں پہلی شکست تھی، قومی ٹیم ورلڈ کپ میں اپنے تمام 9 لیگ میچز میں کامیابی کے بعد سیمی فائنل میں بھی کامیاب ہوئی تھی تاہم فائنل میں کینگروز نے بھارتی ارمانوں پر پانی پھیر دیا۔
