امریکہ میں تاریخ کا شدید ترین برفیلا طوفان ، مائنس 39 ڈگری درجہ حرارت سے نظام زندگی بری طرح متاثر؛ 18 افراد ہلاک، 2700 سے زائد پروازیں رد
واشنگٹن 25 ڈسمبر (ایس او نیوز) امریکا میں تاریخ کے شدید ترین برفیلے طوفان سے نظام زندگی بری طرح متاثر ہوئی ہے، جبکہ اس طوفان سے زبردست تباہی سے 18 لوگوں کے ہلاک کی خبر ہے۔ میڈیا رپورٹوں کے مطابق پورے امریکا میں برف باری کے ساتھ برفیلی ہوائیں چل رہی ہیں۔ کینیڈا بارڈر کے پاس مونٹانا کے ہاورے میں درجہ حرارت مائنس 39 ڈگری تک پہنچ گیا ہے۔ جہاز، ریلوے سمیت ٹرانسپورٹ سروس متاثر ہوگئی ہیں۔ کئی جگہوں پر برف میں گاڑیاں پھنسی ہوئی ہیں۔ اس کے علاوہ کئی پروازیں کینسل کردی گئی ہیں۔ ہزاروں امریکی عوام ہوائی اڈوں پر پھنسے ہوئے ہیں۔ 20 کروڑ لوگ یعنی ملک کی قریب 60 فیصد آبادی کپکپادینے والی ٹھنڈ کا سامنا کررہی ہے۔
میڈیا رپورٹوں کے مطابق برفیلے طوفان نے سب سے زیادہ بفیلو اور نیویارک شہر کو متاثر کیا ہے۔ اس طوفان کے سبب ایمرجنسی خدمات پر بھی اثر پڑ رہا ہے۔رپورٹ کے مطابق امریکہ میں برفیلے طوفان کے سبب 2700 سے زائد پروازیں رد کر دی گئی ہیں، جبکہ کسی بھی ایمرجنسی والی حالت سے بچنے کے لیے ہزاروں ایئرلائنز نے اپنے راستے کو بدل دیا ہے۔
پروازیں رد کیے جانے سے ہوائی اڈے پر افرا تفری کا ماحول دیکھنے کو مل رہا ہے۔ کرسمس پر گھر لوٹ رہے لوگوں کو شدید پریشانی کا سامنا کرنا پڑا ہےاوریگن کے پورٹ لینڈ نے 202 یا 46 فیصد پروازوں کو رد کر دیا ہے۔ کیلیفورنیا کے خلیجی علاقہ کے سب سے بڑے ہوائی اڈے سین فرانسسکو ہوائی اڈے سے مجموعی طور پر 51 پروازیں رد کر دی گئی ہیں۔ دیگر 79 پروازوں کے وقت میں تبدیلی کی گئی ہے۔ اس درمیان چھٹیوں کے اسفار کو کم کر دیا گیا ہے، کیونکہ اس ہفتہ کے آخر میں ملک کے دو تہائی حصے میں برفیلے طوفان اور ٹھنڈ کی وجہ سے موسم خراب ہو گیا ہے۔
ہفتے کے روز امریکہ کی نسبتاً گرم ریاستوں ٹیکساس، آرکنساس اور آکلوہوما میں بھی درجہ ِ حرارت صفر ڈگری سینٹی گریڈ سے نیچے گر گیا۔برفباری کی وجہ سے کرسمس سے قبل کی شام سینکڑوں گھروں کی بجلی گل ہو گئی اور کئی علاقے اندھیرے میں ڈوب گئے۔
موسم کی یہ سختی امریکہ کی ریاست نیواڈا کے شہر لاس ویگس تک بھی پہنچ گئی جہاں موسم عموماً گرم رہتا ہے۔ ماہرین ِ موسمیات کے مطابق ممکن ہے کہ اگلے چوبیس گھنٹوں کے دوران لاس ویگس میں برف باری بھی ہو جو کہ ایک انہونی ہوگی۔
امریکہ بھر میں شدید سردی کی لہر کی وجہ سے ذرائع آمدورفت بھی شدید متاثر ہوئے ہیں۔ برفباری کے باعث گاڑیوں کے آپس میں ٹکرانے کے باعث سینکڑوں حادثات درج کیے گئے ہیں ۔ امریکہ کی مشرقی ریاستیں بالخصوص واشنگٹن، فلیڈلفیا، نیویارک اور نیوجرسی تاحال برفباری کی لپیٹ میں ہیں۔
ماہرین ِ موسمیات کی پیشن گوئی کے مطابق ان ریاستوں میں پیر کے روز بھی موسم شدید سرد رہے گا اور درجہ ِ حرارت نقطہ ِ انجماد سے نیچے گر جانے کا امکان ہے۔