جھارکھنڈ کی جیل میں قید وزیر عالمگیر عالم نے استعفیٰ دے دیا
رانچی، 12/ جون (ایس او نیوز /ایجنسی) جھارکھنڈ کے وزیر عالمگیر عالم جو منی لانڈرنگ کیس کے سلسلہ میں جیل میں ہیں، ریاستی کابینہ کے ساتھ ساتھ کانگریس لیجسلیچر پارٹی (سی ایل پی) کے لیڈر کے طور پر بھی مستعفی ہوگئے ہیں، ایک عہدیدار نے منگل کو یہ بات کہی۔
عہدیدار نے کہا کہ عالمگیر عالم نے رانچی میں برسا منڈا سنٹرل جیل سے چیف منسٹر چمپئی سورین کے نام ایک خط میں ایک کابینی وزیر کے طور پر اپنا استعفیٰ پیش کیا۔ عالمگیر عالم نے اے آئی سی سی کے سربراہ ملیکارجن کھرگے کے نام دوسرے خط میں کہا کہ میں کانگریس لیجسلیچر پارٹی لیڈر کے عہدہ سے اپنا استعفیٰ پیش کررہا ہوں۔
میں سی ایل پی لیڈر کی حیثیت سے کام اور خدمت کا موقع دینے پر پارٹی قیادت کا شکرگزار ہوں۔ انفورسمنٹ ڈائرکٹوریٹ (ای ڈی) نے 15 مئی کو کانگریس کے لیڈر کو ان کے مددگار کے مکانات میں تقریباً 32 کروڑ روپئے کی رقم ضبط کرنے کے چند دن بعد منی لانڈرنگ کیس میں گرفتار کیا تھا۔
قبل ازیں چیف منسٹر نے عالم کے چار قلمدانوں پارلیمانی امور، دیہی ترقیات، دیہی کاموں اور پنچایت راج کی ذمہ داری سنبھالی تھی۔ پاکور کے 70 سالہ رکن اسمبلی کو گزشتہ ماہ مرکزی ایجنسی کے زونل دفتر میں انسدادِ منی لانڈرنگ ایکٹ (پی ایم ایل اے) کی دفعات کے تحت تحویل میں لیا گیا تھا۔