کیرالہ میں نپاہ وائرس کے 42 نمونوں کی رپورٹ منفی
کوزی کوڈ،18/ستمبر (ایس او نیوز/ایجنسی) کیرالہ کی وزیر صحت وینا جارج نے اتوارکو تصدیق کی کہ ریاست میں نپاہ کا کوئی نیا معاملہ سامنے نہیں آیا ہے۔
انہوں نے یہ بھی کہا کہ 42 نمونے جو لوگوں سے اکٹھے کیے گئے تھے، جن میں ہائی رسک زمرے کے افراد بھی شامل تھے، لیکن منفی رپورٹ ہوئے۔
وزیر نے اتوارکو میڈیا سے خطاب کرتے ہوئے کہا کہ ایک میڈیکل طالب علم جس کو مشتبہ علامات کے ساتھ الگ تھلگ وارڈ میں رکھا گیا تھا اس کا بھی ٹسٹ منفی آیا ہے۔
وینا جارج نے کہا کہ ریاستی محکمہ صحت کوزی کوڈ میں نپاہ سے متاثرہ افراد کے رابطوں کا پتہ لگانے کی کوششیں جاری رکھے ہوئے ہے۔
انہوں نے کہا کہ ان لوگوں کے موبائل فون ٹاور کی شناخت کے لیے پولیس کی مدد لی جائے گی جن کے بارے میں شبہ ہے کہ وہ متاثرہ افراد سے رابطے میں آئے ہیں۔
وزیر نے کہا کہ زیر علاج چاروں نپاہ مریض مستحکم ہیں اور وہ بچہ جو وینٹی لیٹر پر ہے اس میں بھی بہتری کے آثار دکھائی دے رہے ہیں۔
وزیر نے یہ بھی کہا کہ محکمہ صحت نپاہ ٹیسٹ کے لیے 100 سے زیادہ نمونے جمع کرے گا اور ہائی رسک زمرے میں درج ہر فرد کا ٹسٹ کیا جائے گا۔