یجنگ 16/نومبر (ایس او نیوز/ایجنسی)  چین میں ایک چار منزلہ دفتری عمارت میں اچانک آگ لگ جانے سے  26 ملازمین ہلاک ہوگئے جبکہ  51 افراد زخمی  بتائے گئے ہیں۔ چینی میڈیا کے مطابق آگ صوبے شانکزی کے شہر لولیانگ کی ایک کمرشل عمارت میں لگی جو کوئلے کی کان کن کمپنی کی ملکیت تھی اور اس میں درجنوں دفاتر تھے۔

آگ دفتری عمارت کی پہلی منزل کے ایک کمرے میں لگی  تھی پھر  دیکھتے ہی دیکھتے پورے فلور کو اپنی لپیٹ میں لے لیا۔ آگ کے بلند شعلوں اور سیاہ دھوئیں کے باعث امدادی کاموں میں مشکلات کا سامنا رہا۔

آتشزدگی کے وقت اس عمارت میں 125 سے زائد افراد موجود تھے جن میں سے 63 کو بحفاظت نکال لیا گیا تاہم 26 افراد اپنی جان گنوابیٹھے جبکہ   51 افراد کو شدید زخمی حالت میں اسپتال منتقل کیا گیا۔

پولیس کا کہنا ہے کہ تاحال آگ لگنے کی وجہ کا تعین نہیں ہوسکا۔ تحقیقات جاری ہیں۔

آتشزدگی میں زیادہ تر ہلاکتیں دم گھٹنے کے باعث ہوئیں۔ زخمیوں میں 10 سے زائد کی حالت نازک ہونے کے سبب ہلاکتوں میں اضافے کا خدشہ ظاہر کیا جا رہا ہے۔