ಮಂಗಳೂರು: ಇಲ್ಲಿನ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಇಂದು ಕಸ್ಟಮ್ಸ್ ಅಧಿಕಾರಿಗಳು ಮೂರು ಪ್ರತ್ಯೇಕ ಪ್ರಕರಣಗಳಲ್ಲಿ ಒಟ್ಟು 49.18 ಲಕ್ಷ ರೂ. ಮೌಲ್ಯದ ಚಿನ್ನವನ್ನು ವಶಪಡಿಸಿಕೊಂಡಿದ್ದಾರೆ.
ಗುದದ್ವಾರದಲ್ಲಿ ಅಡಗಿಸಿಟ್ಟಿದ್ದ ವಿದೇಶಿ ಮೂಲದ 24 ಕ್ಯಾರೆಟ್ ಶುದ್ಧತೆಯ 1,532.11 ಗ್ರಾಂ ಚಿನ್ನವನ್ನು ಮೂವರು ಪ್ರಯಾಣಿಕರಿಂದ ವಶಪಡಿಸಿಕೊಂಡಿದ್ದಾರೆ. ತಪಾಸಣೆ ವೇಳೆ ಈ ಪ್ರಕರಣ ಬೆಳಕಿಗೆ ಬಂದಿದೆ. 
ಒಬ್ಬನಿಂದ 17.19 ಲಕ್ಷ ರೂ. ಮೌಲ್ಯದ 535.61 ಗ್ರಾಂ ಚಿನ್ನ, ಇನ್ನೊಬ್ಬನ ಬಳಿ 16.21 ಲಕ್ಷ ರೂ. ಮೌಲ್ಯದ 505.04 ಗ್ರಾಂ ಹಾಗೂ ಮತ್ತೊಬ್ಬ ವ್ಯಕ್ತಿಯ ಬಳಿಯಿಂದ 15.77 ಲಕ್ಷ ರೂ. ಮೌಲ್ಯದ 491 ಗ್ರಾಂ ಚಿನ್ನ ಪತ್ತೆಯಾಗಿದೆ. ಕೆಲವೇ ದಿನಗಳ ಹಿಂದೆ ಕಸ್ಟಮ್ಸ್ ಅಧಿಕಾರಿಗಳು ಇದೇ ರೀತಿ ಸಾಗಿಸಿದ್ದ 10.30 ಲಕ್ಷ ರೂ. ಮೌಲ್ಯದ ಚಿನ್ನವನ್ನು ವಶಪಡಿಸಿಕೊಂಡಿದ್ದರು