لیبیا:سوڈانی بچے داعش کی قید سے آزاد
طرابلس،21اگست(ایس او نیوز؍آئی این ایس انڈیا)لیبیا کے شہر مصراتہ میں 4سوڈانی بچوں کو ان کے وطن واپس بھیجنے کے لیے سوڈان کے قونصل جنرل کے حوالے کر دیا گیا۔ خیال ہے کہ ان بچوں کے باپ گزشتہ برس لیبیا کے شہر سرت میں داعش تنظیم کی صفوں میں شامل ہو کر لڑتے ہوئے اپنی جانوں سے ہاتھ دھو بیٹھے۔سرت شہر 2015سے 2016تک داعش تنظیم کا گڑھ رہا۔ اس دوران لیبیا کی افواج نے امریکی فضائی کارروائیوں کی معاونت سے تنظیم کو نکالنے کی کوشش جاری رکھی۔ سیکڑوں غیر ملکی شدت پسندوں نے سرت میں داعش تنظیم میں شمولیت اختیار کی۔لڑائی کے اختتام پر گرفتار ہونے والے درجنوں بچوں اور خواتین کو مصراتہ شہر میں رکھا گیا جہاں سے سرت میں عسکری مہم کی کمان کی جا رہی تھی۔ان افراد میں تیونس ، مصر ، سوڈان ، سینیگال ، چاڈ اور نائیجر کے شہری شامل ہیں۔ لیبیا سے تعلق رکھنے والے 21بچوں کو ان کے اہل خانہ کے حوالے کیا گیا۔