ನವದೆಹಲಿ, ಜ ೧೦: ಜನವರಿ ೧೩ ರ ಬಳಿಕವೂ ಗ್ರಾಹಕರು ಪೆಟ್ರೋಲ್ ಪಂಪ್ ಗಳಲ್ಲಿ ಇಂಧನ ಖರೀದಿಸಲು ತಮ್ಮ ಕ್ರೆಡಿಟ್, ಡೆಬಿಟ್ ಕಾರ್ಡ್ ಗಳನ್ನು ಹೆಚ್ಚುವರಿ ಶುಲ್ಕವಿಲ್ಲದೇ ಉಪಯೋಗಿಸಬಹುದು ಎಂದು ಕೇಂದ್ರ ಸರ್ಕಾರ ಸೋಮವಾರ ಪ್ರಕಟಿಸಿದೆ.’
ಬ್ಯಾಂಕ್ ಮತ್ತು ತೈಲಸಂಸ್ಥೆಗಳ ನಡುವೆ ನಡೆದ ವಿಚಾರ ವಿಮರ್ಶೆಯ ಬಳಿಕ ಈ ತೀರ್ಮಾನವನ್ನು ಕೈಗೊಳ್ಳಲಾಗಿದೆ. ಇದಕ್ಕೂ ಮುನ್ನ ಪ್ರತಿ ಬಾರಿ ಕಾರ್ಡ್ ಸ್ವೈಪ್ ಮಾಡಿದಾಗ ಹೆಚ್ಚುವರಿ ಶುಲ್ಕ ಪಡೆಯಲಾಗುತ್ತಿದ್ದು ಇದನ್ನು ಗ್ರಾಹಕರು ವಿರೋಧಿಸಿದ ಬಳಿಕ ಮುಷ್ಕರಕ್ಕೆ ಪೆಟ್ರೋಲ್ ಪಂಪ್ ಗಳು ಸಿದ್ದವಾಗುತ್ತಿದ್ದವು.
Merchant Discount Rate (MDR) ಎಂಬ ಶುಲ್ಕ ಈಗಲೂ ಪ್ರಸ್ತುತವಿದ್ದು ಇದನ್ನು ಯಾರು ಭರಿಸಬೇಕು ಎಂಬ ಬಗ್ಗೆ ಚರ್ಚೆ ಇನ್ನೂ ಮುಂದುವರೆದಿದೆ ಎಂದು ತೈಲ ಸಚಿವ ಧರ್ಮೇಂದ್ರ ಪ್ರಧಾನ್ ತಿಳಿಸಿದ್ದಾರೆ. ಇದಕ್ಕೂ ಮುನ್ನ ಅವರು ವಿತ್ತ ಸಚಿವ ಅರುಣ್ ಜೈಟ್ಲಿಯವರನ್ನು ಭೇಟಿಯಾಗಿ ಸಮಾಲೋಚನೆ ನಡೆಸಿದ್ದರು.
ಈ ಸಮಾಲೋಚನೆಯ ಪ್ರಕಾರ ಈ ಹೆಚ್ಚುವರಿ ಶುಲ್ಕವನ್ನು ಪೆಟ್ರೋಲ್ ಪಂಪ್ ಅಥವಾ ಇತರ ಯಾವುದೇ ವಾಣಿಜ್ಯ ಸಂಸ್ಥೆ ಗ್ರಾಹಕರ ಮೇಲೆ ವರ್ಗಾಯಿಸಬಾರದೆಂದು ತೀರ್ಮಾನಿಸಲಾಗಿದೆ ಎಂದು ಅವರು ತಿಳಿಸಿದರು.
್