بھٹکل:15؍فروری(ایس اؤ نیوز)مرڈیشور کے روڈ کنارے واقع کیریکٹے ہائر پرائمری اسکول عمارت کے 4کمروں کو خالی کرنے اترکنڑا ضلع پنچایت کے سی ای اؤ محمد روشن نے حکم جاری کیا ہے۔ بتایا گیا ہے کہ متعلقہ اسکول کی عمارت کےکمرے خستہ حالی کا شکار ہیں   اور کبھی بھی نیچے گرسکتے ہیں۔ اسکول طلبا کے تحفظ کے پیش نظر اس طرح کا  فیصلہ لیا گیا ہے۔

کریکٹے اسکول کی تعمیر 1935میں ہوئی تھی جس میں راستے کنارے  کے چار کمروں میں سے دو کمرےسال  2000میں ، ایک کمرہ 2002میں اور ایک کمرہ 2012میں تعمیر کئے گئے تھے۔ فی الحال اسکول میں 142طلبا زیر تعلیم ہیں۔ ایک مہمان ٹیچر سمیت کل 7اساتذہ تدریسی خدمات انجام دے رہے ہیں۔ اسکول کے پڑوس میں سڑک کا تعمیراتی کام جاری ہے، حال ہی میں اندرونی نالیوں  کی بدنظمی کی وجہ سے طلبا اور والدین نے احتجاج کیا تھا۔

اسکول عمارت خالی کرنے کی مخالفت: والدین نے اسکول عمارت خالی کرائےجانےکی مخالفت کی ہے۔ معاملے کو لےکر اسکول میں سنیچر کو سرپرستوں نے میٹنگ کی۔ والدین نے کہاکہ سڑک کی  توسیع کے لئے تعمیراتی کام کے بہانے صرف غریبوں کی  دکانوں  اور غریبوں کے بچے تعلیم پانے والی اسکول کو ہی خالی کرایا جارہاہے۔ اس معاملے میں امیروں کے متعلق نرم رویہ اختیار کئے جانےپر والدین نے میٹنگ میں برہمی کا اظہار کیا۔ والدین نے طئے کیا کہ اسکول کو خالی  کرانے نہیں دیا  جائے گا۔

میٹنگ میں اسکول کے صدر مدرس نے اعلیٰ افسران کی جانب سے دی گئے  حکمنامے کو پیش کیا جس پر والدین نے کہاکہ کم سےکم بچوں کے سالانہ امتحانات ہونے تک عمارت خالی نہ کرانے کی اپیل کی جانی چاہئے۔

اس سلسلےمیں تعلقہ بلاک ایجوکیشن آفیسر ایم آر منجی نےکہاکہ اسکول عمارت کے چار کمرے خطرے میں ہیں جس کو دیکھتے ہوئے ضلع پنچایت سی ای اؤ نے خالی کرانے کا حکم دیا ہے۔ انہوں نے یقین دلایا کہ طلبا کی تعلیمی سہولیات کا متبادل انتظام کرنے کے بعد ہی اگلی کارروائی کی جائے گی۔