منصورخان ہنوز لاپتہ-ایس آئی ٹی گھپلے کی جانچ کرے گی آئی ایم اے کے بانی جہاں بھی ہوں سامنے آجائیں -حکومت مسئلہ کو حل کرنے میں ہرممکن تعاون کرے گی:ضمیراحمدخان

Source: S.O. News Service | By Shahid Mukhtesar | Published on 12th June 2019, 10:25 AM | ریاستی خبریں |

بنگلورو،12؍جون(ایس او نیوز) آئی ایم اے کمپنی میں سرمایہ لگانے والے سرمایہ کاروں کی جانب سے پولیس میں شکایات داخل کرنے کا سلسلہ ہنوز جاری ہے - شیواجی نگر کے شیواجی سرکل پر واقع اے ایس کنونشن ہال میں پولیس نے تین کاؤنٹرس کھولے ہیں -آج صبح سے شام تک تقریباً 4,500 ڈپازٹروں نے شکایات درج کرائی ہیں -اس طرح اب تک آئی ایم اے کے خلاف شکایات درج کرانے والوں کی تعداد 8ہزار سے تجاوزکرگئی ہے - ریاستی وزیربرائے امور اقلیت اوقاف حج اور شہری رسدات بی زیڈ ضمیراحمد خان کی قیادت میں مسلم فیڈریشن آف کرناٹک کے اراکین پر مشتمل ایک وفد نے آج صبح ریاستی وزیر داخلہ ایم بی پاٹل سے ملاقات کرکے آئی ایم اے کے اس دھوکہ کی تفصیلی جانچ ایس آئی ٹی کے ذریعہ کروانے کی درخواست کی اور غریب سرمایہ کاروں کا سرمایہ واپس دلانے میں حکومت کی مداخلت کا مطالبہ بھی کیا -اس کے بعد وفد نے وزیراعلیٰ کمارسوامی سے بھی ملاقات کرکے آئی ایم اے گھپلے کی منصفانہ جانچ کرکے حقائق منظرعام پر لانے کا مطالبہ کیا ہے اور اس گھپلہ میں ملوث لوگوں کے خلاف سخت کارروائی کرنے کا بھی مطالبہ کیا ہے - اس وفد میں اراکین کونسل نصیراحمد، عبدالجبار اور رضوان ارشد بھی شامل تھے - مسلم وفد سے ملاقات کے بعد وزیراعلیٰ نے آئی ایم اے گھپلہ کی جانچ کی ذمہ داری ایس آئی ٹی کو دئے جانے کا اعلان کردیا ہے -اب ایس آئی ٹی اس پورے معاملہ کی جانچ کرے گی-

ضمیراحمد خان سرگرم:آئی ایم اے کے منیجنگ ڈائرکٹر محمد منصور خان کی آڈیو کلپ جاری ہونے کے ایک دن بعد وزیر اقلیتی بہبود کافی سرگرم ہوگئے ہیں - آج شام یہاں وکاس سودھا میں ایک اخباری کانفرنس سے خطاب کرتے ہوئے وزیر موصوف نے آئی ایم اے گھپلہ کی جانچ کی نگرانی کرنے ایک وظیفہ یاب جج، فائنانس افسر، ریونیو افسراور ایک وظیفہ یاب مسلم آئی پی ایس افسر پر مشتمل ایک کمیٹی تشکیل دینے کا حکومت سے مطالبہ کیا ہے - انہوں نے بتایا کہ منصور خان کے نام سے سوشیل میڈیا پر وائرل ہونے والا آڈیو کلپ اصلی ہے یا فرضی اس کا پتہ لگانے یہ آڈیو کلپ لیب روانہ کی گئی ہے -انہوں نے بتایا کہ آئی ایم اے میں صرف بنگلور نہیں بلکہ ریاست کے مختلف اضلاع کے لوگوں نے بھی سرمایہ لگایا ہے - بنگلور کی طرح ریاست کے دیگر اضلاع ہیڈکوارٹروں اور تعلقہ جات کے پولیس تھانوں میں شکایات درج کروانے کی سہولت مہیا ہے -لہٰذا دیگر اضلاع کے لوگ بنگلورآکر شکایات درج کرنے کی بجائے اپنے اپنے متعلقہ پولیس تھانوں میں شکایات درج کرواسکتے ہیں -

غریبوں کی رقم واپس مل جائے:انہوں نے بتایا کہ ہزاروں غریبوں اورمزدوروں نے آئی ایم اے میں اپنی زندگی بھر کی پونجی لگائی ہے - ہماری یہ کوشش ہے کہ غریبوں کی رقم انہیں واپس مل جائے -انہوں نے کہاکہ آڈیو کلپ میں منصورخان نے ہماری پارٹی کے ایک رکن اسمبلی کا بھی نام لیا ہے جنہوں نے 400 کروڑ روپئے لئے ہیں -حالانکہ متعلقہ رکن اسمبلی نے اس الزام سے انکارکیا ہے -اتنے بڑے الزام کے بعد اس پورے معاملہ کی ایس آئی ٹی کے ذریعہ جانچ ہونی چاہئے -خاطیوں کو سخت سے سخت سزا ملنی چاہئے -ان کے ساتھ کسی بھی قسم کی نرمی نہ برتی جائے - 

ضمیراحمدخان کا پیغام منصور خان کے نام:غریبوں کی رقم واپس کرنے کو تب ہی یقینی بنایا جاسکتا ہے جب منصور خان سامنے آجائیں -منصور خان سے غائبانہ مخاطب کرتے ہوئے ضمیر احمد نے کہاکہ آپ کے روپوش ہونے سے کچھ نہیں ہوگا- آپ جہاں کہیں بھی ہیں سامنے آجائیں - آپ کے بغیر غریبوں کی رقم واپس کرنا مشکل ہے - آپ سامنے آجائیں تو حکومت آپ کا تحفظ کرنے اور آپ کے مسائل حل کرنے میں بھرپور تعاون کرے گی-منصورخان صاحب جن سیاستدانوں اور افسران نے آپ سے رقم لی ہے اگر آپ نام بتائیں تو وہ رقم واپس لینے میں حکومت ہر ممکن کوشش کرے گی اورآپ کا بھرپور تعاون بھی کرے گی- آپ سے جنہوں نے رقم لی ہے حکومت ان سے وصول کرے گی -آپ کو کسی سے خوف زدہ ہونے کی ضرورت نہیں، حکومت آپ کو مکمل تحفظ فراہم کرے گی، ڈرنے کی ہرگز ضرورت نہیں - حکومت غریبوں کو ان کے خون پسینے کی رقم واپس دلانا چاہتی ہے - جن لوگوں نے آپ کو دھوکہ دیا ہے ان کے خلاف حکومت سختی سے کارروائی کرے گی اور ان سے رقم وصول کرنے میں مدد کرے گی-

علمائے کرام نے بھی صحیح سمت نہیں بتائی:ضمیراحمد نے بتایا کہ ایک اطلاع کے مطابق آئی ایم اے میں سرمایہ کاروں نے 2ہزار کروڑ روپئے سے زیادہ سرمایہ لگایا ہے، کئی مرتبہ خود منصورخان نے بھی اس کا اعتراف کیا ہے -انہوں نے بتایا کہ حلال منافع کی خاطر لوگوں نے سرمایہ لگایا - خون پسینے کی گاڑی کمائی آئی ایم اے میں لگادی -انہوں نے مزید کہاکہ اس معاملہ میں چند علمائے کرام نے صحیح رہنمائی نہیں کی بلکہ آئی ایم اے کی تائید کی - ضمیراحمد نے بتایا کہ اس کے بعد ایسی پونزی کمپنیوں کا ہمیشہ خاتمہ ہوناچاہئے -وزیراعلیٰ کو بھی انہوں نے مشورہ دیا ہے کہ ایسی کمپنیوں کو شروع کرنے کی اجازت ہی نہ دی جائے-

متاثرین کے نام پیغام:آئی ایم اے میں سرمایہ لگانے والے متاثرین کو مخاطب کرتے ہوئے ضمیراحمد خان نے کہاکہ وہ مایوس ہوکر کوئی غلط قدم نہ اٹھائیں بلکہ اللہ سے دعا کریں کہ ان کی رقم واپسی کا مناسب حل نکلے- ذرائع کے مطابق خود ضمیراحمدخان نے آئی ایم اے سے 5کروڑ روپئے قرض لیا ہے - انہوں نے ایک حلف نامہ میں اس کا اعتراف بھی کیا ہے - کیا ضمیراحمد خان یہ قرضہ کمپنی کو لوٹاکر سرمایہ کاروں کو رقم واپس کرنے میں مدد کریں گے؟ کل سے آئی ایم اے کے ماتحت آنے والے تمام وینچرس جیسے میڈیکل شاپس،زیورات کے شورومس وغیرہ بند ہیں -

ایک نظر اس پر بھی

آئی ایم اے کیس کی ایس آئی ٹی جانچ تقریباً مکمل، 9ستمبر کو چارج شیٹ ممکن

کروڑوں روپے کے آئی ایم اے فراڈ کیس کی جانچ میں لگی ریاستی پولیس کی خصوصی تحقیقاتی ٹیم(ایس آئی ٹی) اس معاملے میں 9ستمبر کو چارج شیٹ دائر کرنے کی تیاری میں لگی ہے تو دوسری طرف اس کیس کی جانچ ابھی ابھی اپنے ماتحت لینے والی مرکزی تحقیقاتی ایجنسی سی بی آئی کی طرف سے اس کیس میں ایک سابق ...

ایڈی یورپا کو پارٹی ہائی کمان کی تنبیہ۔ وزارتی قلمدان تقسیم کرو یا پھر اسمبلی تحلیل کرو

عتبر ذرائع سے ملنے والی خبر کے مطابق بی جے پی ہائی کمان نے وزیراعلیٰ کرناٹکا ایڈی یورپا کو تنبیہ کرتے ہوئے کہا ہے کہ وزارتی قملدانوں سے متعلق الجھن اور وزارت سے محروم اراکین اسمبلی کے خلفشار کو جلد سے جلد دور کرلیں ورنہ پھر اسمبلی کو تحلیل کرتے ہوئے از سرِ نو انتخابات کا سامنا ...

اے پی سی آر نے داخل کی انسداددہشت گردی قانون میں ترمیم کے خلاف سپریم کورٹ میں اپیل

مرکزی حکومت نے انسداد دہشت گردی قانون یو اے پی اے میں جو حالیہ ترمیم کی ہے اور کسی بھی فرد کو محض شبہات کی بنیاد پر دہشت گرد قرار دینے کے لئے تحقیقاتی ایجنسیوں کو جو کھلی چھوٹ دی ہے اسے چیلنج کرتے ہوئے ایسوسی ایشن فار  پروٹیکشن آف سوِل رائٹس (اے پی سی آر) نے سپریم کورٹ میں اپیل ...