بھٹکل میں جوان لڑکی نے کنویں میں چھلانگ لگا کر کی خودکشی؛ بیماری اور تنگ دستی بتائی جارہی ہے وجہ
بھٹکل 4/ڈسمبر(ایس او نیوز) تعلقہ کے مُٹھلی میں ایک جواں سال لڑکی نے مبینہ طور پر کنویں میں کود کر خودکشی کرلی جس کی شناخت چیتنا لکمشن نائک (22) کی حیثیت سے کی گئی ہے۔ خودکشی کی یہ واردات منگل کو پیش آئی ہے۔
بتایا گیا ہے کہ چیتنا نائک اپنی فالج زدہ بیمار ماں کے ساتھ رہتی تھی اور خود بھی ذیابیطس کے مرض میں مبتلا تھی۔وہ بھٹکل میں ایک بیوٹی پارلر میں ملازمت کرتی تھی، شبہ ظاہر کیا جارہا ہے کہ کافی غربت کے ساتھ ساتھ بیمار ماں سے بھی پریشان ہوکر اس نے خودکشی کی ہوگی۔ ذرائع نے بتایا کہ چیتنا نائک کی ایک بڑی بہن ہے جو شادی کے بعد اپنے شوہر کے ساتھ رہتی ہے۔
مقامی لوگوں نے اس بات پر تشویش ظاہر کی ہے کہ چیتنا نائک کی اچانک خودکشی کے بعد اس کی والدہ پاروتی نائک کو اب کون اور کیسے سنبھالے گا۔ لوگوں کے مطابق کافی عرصہ پہلے ہی پاروتی نائک کا شوہر اُسے اکیلا چھوڑ کر چلا گیا تھا ۔
مقامی لوگوں نے چیتنا نائک کی نعش کو کنویں سے باہر نکالا، بعد میں پولس نے موقع پر پہنچ کر ضروری کاغذی کاروائی کے بعد نعش کو پوسٹ مارٹم کے لئے روانہ کردیا۔
خودکشی کے تعلق سے بھٹکل ٹاون پولس تھانہ میں معاملہ درج کیا گیا ہے ، پولس مزید چھان بین کررہی ہے۔
