کرناٹک کے وزیراعلیٰ یڈیورپا نے آر ایس ایس سےاپنے تعلق کو مانتے ہوئے کہا ؛میں جس مقام پر ہوں وہ آر ایس ایس کی دین ہے
بنگلورو، 6؍مارچ (ایس او نیوز) کرناٹک کے وزیراعلیٰ یڈی یورپا نے اپنی زبان سے اقرار کیا کہ ان کا تعلق آر ایس ایس سے ہے، اخبار نویسوں سے گفتگو کرتے ہوئے یڈی یورپا نے بتایا کہ میں جس مقام پر ہوں وہ آر ایس ایس کی دین ہے۔
یڈی یورپانے کہا کہ ریاستی اسمبلی میں کانگریس نے دوسرے دن بھی ایک ملک ایک الیکشن کے موضوع پر بحث میں حصہ نہیں لیا اور حسب معمول ایوان میں دھرنا جاری رکھا۔ جس پر وزیراعلیٰ ایڈی یورپا نے کہا کہ کانگریس ایک ملک ایک الیکشن کو آر ایس ایس کا ایجنڈا قرار دیتے ہوئے اس موضوع پر بحث میں حصہ لینے سے انکار کررہی ہے۔ انہوں نے مزید بتایا کہ آج میں جس مقام پر ہوں وہ آر ایس ایس ہی کی دین ہے۔ہمارے وزیراعظم نریندر مودی بھی آر ایس ایس ورکر ہیں۔ اس کے باوجود آر ایس ایس پر طنز کرنا یا آر ایس ایس کو شک کی نگاہ سے دیکھنا کانگریس کو زیب نہیں دیتا۔ انہوں نے کانگریس کو متنبہ کیا کہ آر ایس ایس کے خلاف کچھ بھی کہنے سے باز رہے۔
یڈی یورپا نے کہا کہ اسمبلی سیشن شروع ہونے سے قبل ایک ملک ایک الیکشن پر ایوان میں بحث کرنے کانگریس سے بھی اسمبلی اسپیکر نے ان کی موجودگی میں مشورہ کیا تھا۔ کانگریس نے نہ صرف اس پر حامی بھری تھی بلکہ اس بحث میں حصہ لینے اپنی پارٹی کے19؍ اراکین کے ناموں کی فہرست بھی اسپیکر کے حوالے کی تھی لیکن ایک دن بعد کانگریس کا یو ٹرن سمجھ سے باہر ہے۔اب آر ایس ایس کو بدنام کیا جارہا ہے۔ انہوں نے کہا کہ اپوزیشن جتنی بار آر ایس ایس کا نام لے گی آر ایس ایس اتنی ہی طاقتور ہوگی۔