یلاپور : دو ہفتوں بعد اربیل گھاٹ پر بھاری گاڑیوں کے لئے دی گئی اجازت
یلاپور ،4؍ اگست (ایس او نیوز) دو ہفتہ قبل نیشنل ہائی وے 63 کے اربیل گھاٹ علاقہ میں کئی جگہ زمین کھسکنے اور ملبہ سڑک پر گرنے کی وجہ سے موٹر گاڑیوں کی آمد و رفت پر پابندی لگائی گئی تھی جس کی وجہ سے مختلف مقامات سے سامان لاد کر آنے جانے والے ٹرکس اور ایندھن کے ٹینکرس سڑک کناے لمبی قطاریں لگا کر کھڑے رہنے پر مجبور ہوگئے تھے ۔
اس مسئلے کو حل کرنے کے لئے انتظامیہ نے ایک دوسرا عبوری راستہ تیار کیا جس پر منگل کے دن بھاری موٹر گاڑیوں کی ٹریفک دیکھی گئی ۔ اس سلسلے میں محکمہ پولیس کے افسران سے دریافت کیا گیا تو انہوں نے کہا ہوسکتا ہے کہ سڑک پر تجرباتی طور پر کچھ موٹر گاڑیوں کو انکولہ کی طرف سے دوڑایا جا رہا ہوگا ۔ لیکن یلاپور سے بھاری گاڑیوں کو چھوڑا نہیں گیا ہے ۔ ضلع ڈپٹی کمشنر کا حکم ملنے کے بعد ہی گاڑیوں کو نکلنے کی اجازت دی جائے گی ۔
اس دوران دور دراز مقامات سے تعلق رکھنے والے جو ڈرائیورس اور کلینرس گزشتہ پندرہ دنوں سے یہاں سڑک کنارے پھنسے ہوئے ہیں انہوں نے شکایت کی ہے کہ مقامی افراد کی گاڑیوں کو چھوڑا جارہا ہے اور ہم لوگوں کو جانے نہیں دیا جا رہا ہے ۔
اس شکایت پر ردعمل ظاہر کرتے ہوئے تحصیلدار شری کرشن کمار نے کہا کہ یلاپور تک چیونٹیوں کی طرح موٹر گاڑیوں کی قطاریں لگی ہوئی ہیں ۔ ڈرائیوروں کے تحفظ کے نقطہ نظر سے کچھ گاڑیوں کو دھیمی رفتار سے اس راستے پر چلنے کی اجازت تجرباتی طور پر دی گئی ہے ۔ خواہ مخواہ اس سے الجھن پیدا کرنے کی ضرورت نہیں ہے۔ بدھ کے دن سے سڑک پر گاڑیوں کو دوڑنے کی اجازت دی جائے گی ۔