یلاپور ضمنی انتخاب:بی جے پی امیدوار شیو رام ہیبار کی ہزیمت۔ گاؤں والوں نے واپس جانے پر کیا مجبور
سرسی 28/نومبر (ایس او نیوز) کانگریس پارٹی کو چھوڑ کر بی جے پی کے ساتھ جانے اور کنول کے نشان پریلاپور سے ضمنی انتخاب لڑنے والے شیورام ہیبار کو اپنی تشہیری مہم کے دوران بڑی ہزیمت کا سامنا کرناپڑا جب گاؤں والوں نے ان کے خلاف منفی رویہ اپنایا اور اپنے غصے کا نشانہ بنایا۔ جس کے بعد شیورام ہیبار کو وہاں سے منھ سے لٹکاکر واپس لوٹنے پر مجبور ہونا پڑا۔
جیسے ہی شیورام ہیبار مضافاتی علاقے میں اپنے حق میں ووٹ مانگنے کے لئے پہنچے تو مقامی عوام نے انہیں گھیرلیا اور سوالات کی بوچھاڑ کردی کہ اس سے پہلے والے انتخاب میں آپ نے بی جے پی کے خلاف بولتے ہوئے کانگریسی امیدوار کے طور پر ہم سے ووٹ مانگے تھے۔ اب اسی بی جے پی کی حمایت میں ہم سے ووٹ طلب کرنے آئے ہیں۔ہیبار کو آڑے ہاتھوں لیتے ہوئے انہوں نے کہا کہ دراصل آپ نے عوام کودھوکا دیا ہے۔بی جے پی کے خلاف آپ نے جو کہا تھا اس پر آپ کو قائم رہنا چاہیے تھا۔اگر آپ کانگریس میں ہوتے تو ہم آپ کو ووٹ دیتے،لیکن آپ اپنے مفاد کے لئے بی جے پی میں شامل ہوئے ہیں۔
اس صورت حال سے پریشان شیورام ہیبار نے مشتعل عوام کو سمجھانے کی کوشش کرتے ہوئے کہا کہ ووٹ ڈالنے کے لئے کسی پر زبردستی نہیں کی جارہی ہے۔ ووٹ ڈالنا ووٹر کا اپنا حق ہے۔ لیکن بدلتے ہوئے حالات میں اپنے حلقے کی ترقی کے لئے میں بی جے پی میں شامل ہوگیا ہوں۔ہیبار کی اس وضاحت کا مقامی لوگوں پر کوئی اثر نہیں ہوا۔ ہیبار کے حمایتی افراد نے لوگوں کو سمجھانے کی کوشش تولوگوں کااشتعال اور بڑھ گیا اور آپس میں تو تو میں میں کی صورتحال پید ا ہوگئی۔
معلوم ہو اہے کہ جب عوام کے جذبات کو کسی طرح قابو میں نہیں کیا جاسکا تو شیورام ہیبار وہاں سے مایوسی اور برہمی کے ساتھ واپس لوٹ گئے۔