یلاپور ضمنی انتخاب:بغیر قانونی دستاویزات والی 1.02کروڑ روپے نقدی اور 4.18لاکھ مالیت کی شراب اور منشیات ہوئی ضبط
کاروار4/دسمبر (ایس او نیوز) یلاپور ضمنی انتخاب کے پس منظر میں پورے ضلع شمالی کینرا کے اندر انتخابی ضابطہ اخلاق لاگو کیا گیا ہے۔ 5دسمبر کو ہونے والے انتخاب کی تشہیری مہم بھی اپنے اختتام کو پہنچ چکی ہے۔
اس دوران ضلع انتظامیہ کی جانب سے جاری کیے گئے بیان کے مطابق انتخابی ضابطہ اخلاق لاگو کرنے کے دوران افسران نے مختلف افراسے جملہ 1.02کروڑ روپے ضبط کیے ہیں جس کے بارے میں ان لوگوں کے پاس کوئی قانونی دستاویز یا ثبوت موجود نہیں تھا۔اس کے علاوہ محکمہ آبکار ی کے افسران نے مختلف مقامات پر چھاپے مارنے اور گاڑیوں کی تلاشی لینے کے دوران قانون کی خلاف ورزی کرتے ہوئے لوگوں کی طرف سے رفت یا فروخت کی جارہی یاپھر اپنے پاس رکھی گئی جو شراب اور نشیلی اشیاء ضبط کی ہے اس کی مالیت کا اندازہ4.18لاکھ روپے لگایا گیا ہے۔
بتایا جاتا ہے کہ فلائنگ اسکواڈ کی طرف سے 1لاکھ روپے، ایس ایس ٹی کی طرف سے 9.79لاکھ روپے، پولیس کی طرف سے 91.35لاکھ روپے نقد ضبط کیے گئے تھے۔اس میں وہ غیر ملکی کرنسی بھی شامل ہے جو کاروار میں پولیس نے ضبط کی تھی۔
ضابطہ اخلاق جاری ہونے کے بعد محکمہ آبکاری نے ضلع شمالی کینرا کے تمام سرحدی علاقوں میں 24x7گاڑیوں کی تلاشی کاکام جاری رکھا اور دوسرے مقامات پرجو کارروائیاں کیں اس میں 4.14لاکھ روپے مالیت کی 1391.2لیٹر شراب، 4950روپے مالیت کی نشہ آور اشیاے، ایک کار، ایک ٹاٹا ایس ٹیمپو،4دو پہیہ گاڑیاں،1گوڈس رکشہ اور موبائل فون وغیرہ ضبط کیے گئے ہیں۔