یلاپور: قومی شاہراہ کے بیچ ہی جل کر بھسم ہوئی سمینٹ سے بھری لاری
یلاپور:17؍ جنوری(ایس اؤ نیوز )سیمنٹ سے بھری لاری میں اچانک آگ لگنے سے لاری مکمل طور پرجل کر خاکستر ہونے کا واقعہ ارےبائیل قومی شاہراہ 63پر منگل صبح 30-08بجے پیش آیا ہے۔
لاری باگلکوٹ سے منگلورو کے لئے نکلی تھی، لیکن ارے بائیل گھاٹ سے اترنے کے دوران لاری میں اچانک آگ لگ گئی۔ عین وقت پر لاری ڈرائیور اور کلینر لاری سے باہر نکل کر اپنی جان بچانے میں کامیاب ہوگئے ۔ موصولہ اطلاعات کے مطابق گھاٹ کے ڈھلان میں لاری نیوٹرل گئیر پر چل رہی تھی اچانک ٹائر پھٹ گیا جس کے فوری بعد لاری میں آگ لگ گئی۔
جائے وقوع پر پہنچی فائر برگیڈ اور پولس عملہ نے آگ بجھانےکی کوشش کی۔ قومی شاہراہ کے بیچوں بیچ لاری میں آگ لگنے سے کچھ دیر کے لئے شاہراہ پر ٹرافک کا نظام بگڑ گیا۔ مگر جلد ہی پولس نے معاملہ سنبھال لیا۔ لاری جلنے سے لاکھوں روپئے مالیت کا نقصان ہوا ہے۔ اور معاملےکو لےکر یلاپور پولس تھانہ میں کیس درج کیا گیا ہے۔
