شیموگہ،24؍اپریل(ایس او نیوز؍یواین آئی) کرناٹک میں اپوزیشن کے لیڈر اور بھارتیہ جنتا پارٹی(بی جے پی)کے ریاستی صدر بی ایس یڈ یورپا نے کہا ہے کہ 23مئی کو لوک سبھا انتخابات کے نتیجے آنے کے بعد کانگریس ۔جنتا دل(سیکولر)اتحادی حکومت گر جائے گی۔یڈ یورپا نے منگل کو اپنے آبائی علاقے شکاری پور میں ووٹنگ کرنے کے بعد نامہ نگاروں سے بات چیت میں کہا کہ 20سے زیادہ کانگریس رکن اسمبلی اتحاد کے سلسلے میں ناخوش ہیں اور وہ حکومت کو گرادیں گے ۔انہوں نے کہا کہ رکن اسمبلی ،وزیراعلیٰ اور ان کے خاندان کے ارکان کی مداخلت کی وجہ سے پریشان ہیں۔وہ حکومت گرا سکتے ہیں۔انہوں نے یقین دلایا کہ بی جے پی کرناٹک کی 22لوک سبھا سیٹوں پر جیت حاصل کرے گی۔انہوں نے الزام لگایا کہ کانگریس ۔جنتا دل(سیکولر) اتحادی حکومت نے دیہی ووٹروں کو متوجہ کرنے کے لئے پیسوں کا استعمال کیا ہے لیکن یہ سب بے کار جائے گا۔ایک سوال کے جواب میں انہوں نے کہا کہ شیموگہ کے ساتھ ساتھ کلبرگی میں بی جے پی امیدوار بھاری ووٹوں کے فرق سے جیت درج کریں گے ۔