میری حکومت بنی تو ایک مسلمان کو وزیر ضرور بناؤں گا: یڈیورپا
بنگلورو،6؍اپریل(ایس او نیوز) سابق وزیراعلیٰ اور ریاستی بی جے پی صدر بی ایس یڈیورپا نے اپنی ہی پارٹی کے رہنما اور سابق نائب وزیراعلیٰ کے ایس ایشورپا کے اس بیان کی مذمت کی ہے جس میں انہوں نے مسلمانوں کے متعلق نازیبا کلمات استعمال کئے تھے۔ آج پریس کلب میں پریس سے ملئے پروگرام سے خطاب کرتے ہوئے یڈیورپا نے کہاکہ ایشورپا کو الفاظ کے استعمال میں احتیاط برتنی چاہئے۔ انہوں نے کہاکہ ایشورپا کا یہ بیان غلط ہے کہ بی جے پی نے کسی مسلمان کو انتخابی ٹکٹ نہیں دی اور آئندہ بھی نہیں دے گی۔ انہوں نے کہاکہ اس سے پہلے جب انہوں نے ریاست میں حکومت قائم کی تھی تو انہوں نے اپنی کابینہ میں مسلمان کو جگہ دی تھی، انتخابات میں بی جے پی کی طرف سے کسی مسلمان کو ٹکٹ دینے کے بارے میں یڈیورپانے کہاکہ پچھلے اسمبلی انتخابات میں ایسا ممکن نہیں ہوا ، کیونکہ پارٹی کی نظر میں کوئی ایسا امیدوار سامنے نہیں آیا۔ البتہ آنے والے دنوں میں اگر بی جے پی کو ریاست کے اقتدار پر آنے کا موقع ملا تو مسلم طبقے سے کسی کو ضرور وزیر بنایا جائے گا۔