کاروار:25؍جولائی  (ایس اؤ نیوز) ریاست کے باغی ارکان اسمبلی میں شامل گزشتہ 20دنوں سے ریاست سے باہر پڑوسی ریاست میں مقیم یلاپور کے رکن اسمبلی شیورام ہیبار اچانک  بدھ کی رات یلاپور پہنچے۔

صبح سویرے اپنے خاص الخاص اور حمایتیوں کے ساتھ سیاسی سطح پر  آئندہ اٹھائے جانے والے قدم کے متعلق سوچ بچارکیا۔ اس کے بعد یلاپور تعلقہ پنچایت دفتر پہنچے۔ جہاں اپنے دفتر میں افسران کے ساتھ طویل میٹنگ کی ، جس میں اپنے اسمبلی حلقہ میں ضروری اور فوری طورپر کئے جانے والے کاموں کے متعلق جانکاری حاصل کی۔

اخبارنویسوں کے سوالوں کا جواب دیتے ہوئے رکن اسمبلی شیورام ہیبار نے کہاکہ میں نے بحیثیت رکن اسمبلی کرناٹکا اسمبلی کے اسپیکر کے آر رمیش کمار کو استعفیٰ سونپاہے۔ لیکن ابھی تک میرے  استعفیٰ کو قبول  کئے جانےکے متعلق کوئی جانکاری نہیں ہے تو فطری طورپر میں اب بھی رکن اسمبلی ہوں ، اسی لئے میں نے آج افسران کے ساتھ میٹنگ کرتے ہوئے ضروری اقدامات کرنے کی ہدایات جاری کی ہیں۔ ایک اور سوال کے جواب میں ہیبار نے کہا کہ اس طرح آفسران کے ساتھ میٹنگ کرنا  کوئی غلط کامنہیں ہے۔ اپنا دفاع کرتے ہوئے ہیبار نے کہا کہ عوام کو کوئی تکلیف یا پریشانی نہ ہو اس سلسلے میں اقدامات کرنے کی ہدایات دینے کے لئے میٹنگ کا انعقاد کیا ہے۔