بھٹکل :15؍جولائی (ایس اؤ نیوز) ریاستی حکومت کے باغی گروہ میں شامل اترکنڑا ضلع یلاپور حلقہ کے رکن اسمبلی شیورام ہیبار نے اپنے حلقہ کے رائے دہندگان سے معافی مانگی ہے۔ وہیں ضلع نگراں کار وزیر آر وی دیش پانڈے کے خلاف ناراضگی کا اظہار کرتے ہوئے کہ شکایت کی ہے کہ اپنی ہی پارٹی سے منسلک ایک رکن اسمبلی اپنے حلقہ کے مسائل کوپوچھنے کی کوشش ہی نہیں کرتے۔
اس طرح رکن اسمبلی شیورام ہیبار نے اسمبلی کی رکنیت سے استعفیٰ دینےکے فیصلے کی وجہ اپنی فیس بک پر پوسٹ کی ہے۔ انہوں نے لکھا ہے کہ ’ میرے عزیز کارکنان اور رائے دہندگان بھائیوں سے اچانک ہونےو الی سیاسی ہنگامہ آرائی اور پیچیدگی کے متعلق معافی مانگتے ہوئے اپنے کٹھن فیصلے کے متعلق اپنی مجبوریوں کو آپ کے ساتھ شئیر کرنا چاہتاہوں۔ ترقی کو ہی اصل مقصد مان کر دوسری مرتبہ رکن اسمبلی کی حیثیت سے منتخب ہونے والا میں ، اس مخلوط حکومت میں مسلسل 15مہینوں سے اپنی سخت کوششوں کے باوجود میرے اپنے حلقہ میں کوئی نیا منصوبہ شروع کرنے میں کامیاب نہیں ہوا۔
ایک طرف حکومت کی تفریقانہ پالیسی تو ، دوسری طرف میرے حلقہ کےمسائل کو لے کر پارٹی اعلیٰ لیڈران نے بھی میری ایک نہیں سنی اورضلع نگراں کاروزیر نے آگے بڑھ کر مسائل کو حل کرنےکے بجائے اپنے ہی ضلع اور پارٹی کے رکن اسمبلی کی حیثیت سے منتخب ہونے والے میرے حلقہ کے مسائل کی طرف دھیان نہیں دیا۔شیورام ہیبار نے آگے لکھا ہے کہ میں ایسا لالچی شخص نہیں ہوں کہ میرے حلقہ کے مفاد کو چھوڑ کر پیسے، لالچ ، عہدے کے لئے میرے اخلاق کو بیچ دوں، مجھے اس کی ضرورت بھی نہیں ہے۔ ‘