یلاپور: وزیر اعلیٰ بسوراج بومائی کا متاثرہ علاقوں کا دورہ : متاثرین سے بات چیت اور مناسب انتظامات کا تیقن
یلاپور:29؍جولائی (ایس اؤ نیوز)بدھ کووزیر اعلیٰ کا عہدہ سنبھالنے کے دوسرے دن ہی یعنی جمعرات کو اترکنڑا ضلع کے سیلاب سے متاثرہ علاقوں کا دورہ کرتے ہوئےوزیراعلیٰ بسوراج بومائی نے سیلاب سے نقصان زدہ علاقوں کا خود معائنہ کیا اور افسران سے تفصیلی جانکاری حاصل کی۔ اس موقع پر متاثرین نے اپنا دکھڑا سناتےہوئے آنسو بہائے۔
تعلقہ کے تلکے بائیل، ارے بائیل علاقوں کا دورہ کرتےہوئے وزیر اعلیٰ نے زمین کھسکے مقامات کا نظارہ کیا۔ تعلقہ میں سب سے زیادہ متاثرہ مقام کلچی کا معائنہ کرنے وزیرا علیٰ پہنچے تو ایک دسویں کلاس کے متعلم نے اپنا دکھڑا سناتے ہوئے کہاکہ سر، ہمارا گھر مکمل منہدم ہوچکاہے، میری پڑھائی کیسے ہوگی؟،کچھ کروسر، ہمارے لئے راحت کا سامان کروسرکہتے ہوئے رونےلگا۔ وزیرا علیٰ نے لڑکے کو سمجھانے کی کوشش کی۔
وزیر اعلیٰ نے تلکے بائیل کی ریاستی شاہراہ 6پر زمین کھسکے مقام پر پہنچ کر حالات کا معائنہ کیااسی دوران وہاں جمع ہوئے سیکڑوں لوگوں نے سیلاب سےہوئے نقصانات کو بتایا ۔ جواب میں وزیر اعلیٰ نے عوام کو تیقن دیا کہ تمہارادکھ سمجھ میں آرہاہے۔ حالات کا بہتر مطالعہ کرنے کے بعد مستقل حل کرنے کی کوشش کی جائے گی۔ اسی طرح وزیر اعلیٰ نے ارے بائیل کی قومی شاہراہ 66، گلاپور اور شیرور مضاف کا دورہ کرتےہوئےعوام سے بات چیت کی اور انہیں مناسب انتظامات کرنے کا تیقن دیا۔
اپنے دورے کے دوران میں اخبارنویسو ں سے گفتگو کرتےہوئےکہاکہ سیلاب سے متاثرین کی ہر طرح سے مدد کرنے کےلئے حکومت کے پاس رقم موجود ہے، نقصانات کا تفصیلی جائزہ لینے کے بعد زائد امداد کے لئے مرکزی حکومت سے اپیل کی جائے گی۔ اس موقع پر ان کے ساتھ رکن اسمبلی شیورام ہیبار، روپالی نائک، دینکر شٹی ، سنیل نائک سمیت کئی افسران موجود تھے۔