اُڈپی 20/جون (ایس او نیوز) آج شام جاری کی گئی رپورٹ کے مطابق اڈپی ضلع میں کووِڈ وباء اپنی پوری رفتار سے جاری ہے۔ سنیچر کے دن جملہ 13افراد کو کووِڈ 19کا مرض لاحق ہونے کی تصدیق ان کی جانچ رپورٹ سے ہوگئی ہے۔

 معلوم ہوا ہے کہ ان 13مریضوں میں 3 بچوں کے ساتھ 9 مرد اور 4عورتیں شامل ہیں۔جملہ 10افراد مہاراشٹرا سے واپس لوٹے ہوئے ہیں۔ ان دس لوگوں میں کل ہلاک ہونے والے مریض کی بیوی اور بیٹی بھی شامل ہے۔ ان کے علاوہ ایک شخص بنگلورو سے سفر کرکے آیا ہے جبکہ ایک شخص اس لیاب ٹیکنی شین(مریض نمبر 5451)کے رابطے میں آیا ہوا ہے جس کی رپورٹ اس سے قبل پوزیٹیو آ چکی ہے۔

ایک طرف معاملات میں روزبروز اضافہ ہورہا ہے تو دوسری طرف لوگوں کے صحت یاب ہوکر اسپتال سے رخصت بھی ہورہے ہیں۔ بتایا گیا ہے کہ آج سنیچر کے دن جملہ 9مریضوں کو صحت یاب ہونے پر اسپتال سے چھٹی  دی گئی ہے۔

 جنوبی کینرا سے ملنے والی رپورٹ کے مطابق وہاں پر آج 4 افراد کی رپورٹ پوزیٹیو نکلی ہے۔ان میں تین مرد اور ایک خاتون شامل ہے۔ان میں سے ایک کویت، ایک سعودی اور ایک مہاراشٹرا سے واپس لوٹنے والا فرد ہے جبکہ چوتھے شخص کو یہ بیماری مریض نمبر8005سے رابطے میں آ نے کی وجہ سے لاحق ہوئی ہے۔