ٰٰٰٰریاض،20؍اکتوبر(ایس او نیوز؍ایجنسی) الحرمین الشریفین کی جنرل پریسیڈینسی کے چیئرمین ڈاکٹر عبدالرحمان السدیس نے مسجد نبویؐ کے زائرین اور روضہ رسول صلی اللہ علیہ وسلم پر حاضری دینے والے مسلمانوں پر زور دیا ہے کہ وہ کووڈ سے بچاؤ کے لیے لازمی قرار دی گئی احتیاطی تدابیر پرسختی کیساتھ عمل درآمد کریں -

رپورٹ کے مطابق نماز عشا کی امامت کے بعد مسجد نبویؐ میں نمازیوں اور زائرین روضہ رسول ؐسے خطاب کرتے ہوئے ڈاکٹر السدیس نے کہا کہ مملکت کے حرمین سے متعلقہ ادارے اور الحرمین الشریفین کی انتظامیہ زائرین کی حفاظت اور سلامتی کے لیے ہمہ وقت سرگرم ہیں تاکہ تمام زائرین آسانی اور سہولت کیساتھ موجودہ وبائی حالات میں عبادت کرسکیں اور عبادت کی ادائی کا یہ سلسلہ تواتر کے ساتھ جاری رہے- مگر یہ صرف اسی صورت میں ممکن ہے کہ ہم سب اور تمام زائرین ان تمام احتیاطی تدابیر پرعمل درآمد یقینی بنائیں جو ہماری صحت کی حفاظت اور سلامتی کے لیے ضروری ہے-

الشیخ ڈاکٹر السدیس نے کورونا کی وبا کی وجہ سے بند کی گئی مسجد نبویؐ اور روضہ رسول ؐ کو زیارت کیلئے کھولے جانے پر پورے عالم اسلام کو مبارک باد پیش کی- ان کا کہنا تھا کہ آج کا دن برکت کا دن ہے کہ مسلمان ایک بار پھر روضہ اطہر اور آپ کے اصحاب کی آخری آرام گاہوں کی زیارت کررہے ہیں -

انہوں نے مسجد نبوی ؐمیں آنے والے زائرین پر انتظامیہ کے ساتھ تعاون کی اپیل کی- انہوں نے خواتین زائرات سے کہا کہ وہ ان تمام ایس اوپیز پرعمل درآمد کریں، جو مردوں کے لیے تیار کیے گئے ہیں - خواتین روضہ رسول ؐ میں شرعی حجاب کو یقینی بنائیں اور انتظامیہ کے ساتھ تعاون کریں -

خیال رہے کہ کل18اکتوبر اتوار کے روز سے سعودی عرب کی حکومت نے مسجد حرام اور مسجد نبویؐ میں نمازیوں اور زائرین کی آمد پرعاید کی گئی پابندی میں مزید نرمی کرتے ہوئے زیادہ تعداد میں نمازیوں کی آمد کی اجازت دے دی ہے-