واشنگٹن،16/ اپریل (ایس او نیوز؍ایجنسی) امریکی صدر ڈونالڈ ٹرمپ نے کہا ہے کہ انہوں نے اپنے انتظامیہ کو امریکہ کی جانب سے عالمی ادارہ صحت (ڈبلیو ایچ او) کو دئیے جانے والے فنڈ کو روکنے کی ہدایت دی ہے -
ٹرمپ نے ڈبلیو ایچ او پر کورونا وائرس کووڈ-19کے پھیلنے سے روکنے میں ناکام رہنے اور اس سے متعلق صحیح معلومات چھپانے کا الزام لگایا ہے - انہوں نے منگل کو وہائٹ ہاؤس میں باقاعدہ پریس بریفنگ کے دوران کہاکہ آج میں اپنی انتظامیہ کو ڈبلیو ایچ او کی فنڈنگ کوروکنے کی ہدایت دے رہا ہوں -
کووڈ-19کے حوالہ سے بدنظمی اور اس کے بڑھتے ہوئے انفیکشن کو چھپانے میں ڈبلیو ایچ او کے کردار کا جائزہ لیا جائے گا- ٹرمپ نے کہا کہ کورونا وائرس کے حوالہ سے ڈبلیو ایچ او کی جوابدہی طے کی جانی چاہئے -امریکی صدر نے کہا کہ چین میں کورونا وائرس کیسوں کے آغاز کے ساتھ ہی ڈبلیو ایچ او اسے قابو کرنے میں ناکام رہا اور اس سے متعلق اصل صورت حال کو مسلسل چھپاتا رہا-
انہوں نے کہا کہ امریکہ ڈبلیو ایچ او کوسالانہ40سے50کروڑ ڈالر کی مالی امداد فراہم کرتا ہے ٹرمپ نے کہا کہ اگر ڈبلیو ایچ او نے وقت پر طبی ماہرین کو چین میں بھیج کر اصل صورت حال کا اندازہ کیا ہوتا اور اس وبا کے سلسلے میں چین کی جانب سے شفافیت میں کمی پر عالمی برادری کو آگاہ کیا ہوتا تو اس وبا کو روکا جا سکتا تھا اس سے ہزاروں لوگوں کی زندگی بچائی جا سکتی تھی اور عالمی معیشت کو ہونے والے نقصان کو بھی بچایا جا سکتا تھا-
قابل غور ہے کہ عالمی وبا کووڈ-19نے امریکہ میں بھیانک شکل اختیارکرلی ہے - جان ہاپکنز یونیورسٹی کی جانب سے جاری تازہ ترین اعداد و شمار کے مطابق امریکہ میں کورونا وائرس سے مرنے والوں کی تعداد25ہزار سے تجاوز کرکے 25992ہوگئی ہے جبکہ 608458/ افراد اس سے متاثر ہوئے ہیں -