بھٹکل :12؍ اپریل(ایس اؤ نیوز) بھٹکل مسلم یوتھ فیڈریشن کی تعلیمی کمیٹی کے زیر اہتمام آزاد نگر کے گرین پیرڈائز شادی ہال میں نوجوانوں کے لئے بعنوان ’ کامیاب رمضان گزارنے کےلئے منصوبہ بندی کیسےکریں؟‘ ایک روزہ ورکشاپ بروز جمعہ کو منعقد ہوا۔

مولانا عبدالباری دامدا ندوی نے پاور پرزنٹیشن کے ذریعے بتایا کہ رمضان کے ایک ماہ میں ہم کس طرح کی منصوبہ بندی کریں اور کیاکیا کریں ۔ یعنی نمازوں کا اہتمام، تلاوت ِقرآن،حفظ قرآن ، حفظ و تعلیم حدیث، صبح و شام کی دعائیں  وغیرہ پر روشنی ڈالی۔ اور ورکشاپ میں شریک ہر نوجوان کو فیڈریشن کی جانب سے رمضان پلانر نامی کتابچہ بھی دیاگیا  تاکہ وہ روزانہ اس کے مطابق عمل کرتے ہوئے اپنی تربیت کرسکیں۔ورکشاپ سے قریب  200نوجوانوں نے استفادہ کیا۔ 

مہمان خصوصی مولوی محمد الیاس جاکٹی ندوی نے  فیڈریشن کے زیر اہتمام  ایک انوکھے پروگرام کے انعقا دپر فیڈریشن کو مبارکبادی پیش کرتے ہوئے امید ظاہر کی کہ آئندہ بھی ایسے انوکھے پروگراموں کا انعقاد ہوگا۔ مولانا نے جاپان ملک کی مثال پیش کرتےہوئے نوجوانوں سے کہاکہ منصوبہ بندی ،اور اوقات کی تنظیم بہت اہم ہوتی ہے۔ ہم صرف اپنے حدود تک بندھے نہ رہیں ، بلکہ سال بہ سال نئے نئے پروگرام کرتےہوئے عملی طورپر ترقی بھی کریں۔ تاکہ نوجوانوں کی جہاں تربیت ہوتی ہے وہیں معاشرہ بھی  ان سے مستفید  ہو۔

مولوی زیان شریف کی تلاوت قرآن سے ورکشاپ کا آغاز ہوا۔ مولوی زفیف شنگیری نے رمضان  پرنظم پیش کی۔ فیڈریشن تعلیمی کمیٹی کے سکریٹری ایڈوکیٹ  عمران لنکا نے استقبال کیا۔ فیڈریشن کے صدر مولوی عزیز الرحمن رکن الدین ندوی نے ورکشاپ کی صدارت کی۔ فواز منصوری نے نظامت کی۔ ڈائس پر فیڈریشن کےجنرل سکریٹری عمیر سعید رکن الدین  وغیرہ موجود تھے۔